اتصلنا بخط الدعم النفسي الخاص بوزارة الصحة لـ’كوفيد-19′ وده اللي حصل..
من حواليّ أسبوع، وزارة الصحة والسكان المصرية أدركت إن كتير من المصريين اتأثروا سلبيًا بسبب حظر التجوال اللي تم تطبيقه في محاولة للحد من انتشار فيروس كورونا المستجد، وعشان كدا أعلن مسئولين من الوزارة عن إطلاق خطين لتقديم الدعم النفسي لكل اللي محتاجينه. الرقمين هما: (080) 8880700 و (02) 20816831.
بسبب الضغط النفسي الناجم عن عزلة الحظر، قررت إني أجرب اتصل وأشوف بنفسي نوع المساعدة النفسية والدعم اللي بيقدموا الخط ده.
لما اتصلت أول مرة، الرقم الأول كان خارج نطاق الخدمة، أما التاني فكان مشغول، جربت أعيد الاتصال كذا مرة، وكنت مبسوط جدا ً إن حد رد. بعد الترحيب بيا، إتسألت عن اللي بعاني منه، وبعد ما شرحت إن الأخبار والسلبية الناتجة عنها دايمًا، ومع الحظر والبعد عن الأصحاب، التواصل مع الغير أونلاين بقت حاجة متعبة وكئيبة لإن كل اللي بنتكلم عنه هو الفيروس، ومن الواضح إن مفيش حل واللي بيحصل بس إننا بنقلق زيادة.
إتسألت بعد كدا على إسمي ورقم تليفوني وإتقالي إن حد هيتصل بيا خلال اليوم، بصراحة كوني شخص متشائم مفكرتش إن حد هيتصل بيا، بس فعلاً إتفاجئت لما إتصل بيا دكتور نفسي من وزارة الصحة، وإتطلب مني أتكلم عن اللي حاسس بيه من ضغط نفسي ولو كنت ملاحظ أي أعراض مرض نفسي على نفسي.
بعد ما قلت للدكتور على كل اللي بمر بيه، نصحني إزاي أقدر ادرب جسمي وعقلي عن طريق التأمل أو استخدام طرق تنفس مختلفة عشان أقدر اهدي نفسي. زيادة على ده، قالي احاول أركز مع افكاري وأشوف إيه منها اللي بيوصف الحقيقة فعلاً وإيه اللي نابع عن خوف غير مبرر.
المحادثة الصغيرة دي ساعدتني فعلاً اهدى شوية، واحاول اتعامل بشكل الطف مع خوفي من الفيروس، وإني أفهم إن أنا مش لوحدي في ده. هتّبع نصيحة الدكتور من النهاردة، وفعلاً اتمنى الوضع ده يتحل في اقرب وقت ممكن.