العمدية هي منصب حساس جدًا في المجتمعات الريفية لإنه بيمثل للمجتمعات دي القائد والقاضي ومصدر الأمان، وعلشان الحساسية دي لازم يكون الشخص اللي بيتم اختياره للمنصب ده قوي وشديد وحقاني ويمتلك السلطة وواثق في تقبل الناس وحبهم له، علشان يتقبلوا أحكامه وقيادته لهم.
حب الناس وثقتهم كان الخلطة السرية اللي حققت لايفا هابييل المعجزة اللي خلتها أول ست قبطية تبقى عمدة على قرية، ومش بس كده، دي كمان قرية في صعيد مصر، والصعيد مجتمع محافظ وعنده عادات وتقاليد قديمة.
في محافظة أسيوط، وفي قرية كومبوها سنة 2008 انتزعت ايفا هابيل لقب العمدة من ايدين 6 رجال صعايدة، وبقت أول ست في مصر تشغل منصب كان حكرًا على الرجال.
اتولدت ايفا هابيل في قرية كومبوها في محافظة أسيوط سنة 1955، وحصلت على ليسانس الحقوق من جامعة القاهرة سنة 1980، واشتغلت في المحاماة وعاشت في القاهرة لمدة عشر سنين، قبل ما تقرر ترجع قريتها في صعيد مصر مرة تانية وتعيش هناك.
انضمت سنة 1994 للحزب الوطني وشغلت منصب أمينة المرأة في قرية كومبوها، وبعد كده اترشحت لعضوية مجلس محلي مركز ديروط، وفازت بالعضوية بعد اكتساح معظم الأصوات، ,وبعدها اترشحت لعضوية مجلس محلي المحافظة عن الحزب الوطني وفارت به.
والد هابيل كان عمدة قرية كومبوها لحد ما توفي سنة 2002، ووقتها طلب منها أهل القرية إنها ترشح نفسها لمنصب العمدة ووافقت، وفي انتخابات العمدية سنة 2009 قدرت هابيل تنتزع المنصب من 6 مرشحين رجال، وقالت لروز اليوسف إن الكلمة اللي ألقتها في مؤتمر الحزب الوطني سنة 2008 أمام الرئيس حسني مبارك كان لها دور كبير في فوزها بمنصب العمدية، حيث تم اختيارها ضمن وفد محافظة أسيوط لتمثيل الحزب في المؤتمر، وألقت كلمة قالت في نهايتها لمبارك: “أنا مرشحة لمنصب العمدة في قريتي في الصعيد وهكون أول عمدة امرأة في مصر”.
وعن علاقة هابيل بوالدها العمدة قالت إنها كانت دايمًا قريبة منه وبتشاركه المجالس العرفية اللي بيحل فيها مشاكل القرية، ومنه اتعلمت إزاي تكون عمدة قوي وحقاني، وقالت في لقاءها مع محمود سعد في برنامج باب الخلق إن العمدة لازم يكون حقاني ومش بيجامل، ولازم اللي يدخل عنده يبقى عارف إنه هياخد حقه.
تم تعيين هابيل في مجلس الشورى سنة 2010، واللي تم حله بعد ثورة يناير سنة 2011، وفضلت هابيل عمدة مؤقت على قرية كومبوها لحد حتى سنة 2014.
كرمها الرئيس عبد الفتاح السيسي سنة 2018 في احتفالية تكريم المرأة المصرية والأم المثالية، واللي بينظمها المجلس القومي للمرأة، وقالت في مكالمة تليفونية مع برنامج “أخبار TEN”، على قناة “TEN”، بعد التكريم، إنها كملت 64 سنة وعاشت فترات سياسية مختلفة، وأكدت إن المرأة لم تمتلك خلال أي فترة سياسية في مصر نفس المكتسبات اللي حصلت عليها في عهد السيسي سواء من خلال التشريعات أو الفرص القيادية.
