أسماء كتير غريبة أو وراها حكاية، عمرك سألت هي ليه اتسمت بكده؟ إيه السبب ورا تسمية شوارع القاهرة وأحيائها، أصل أكيد الأسامي دي ماجاتش من فراغ، ووراها قصص مختلفة، من الدرب الأحمر لحلوان لخان الخليلي، ليه اتسمت معظم شوارع وأحياء القاهرة القديمة بأسماء مختلفة ومميزة؟
خان الخليلي
واحد من أشهر الأماكن في القاهرة القديمة، اتسمى بالاسم ده نسبة للي أسسه، الأمير “جركس الخليلي” وهو واحد من أمراء السلطان برقوق، وبيضم خان الخليلي مساجد ومعالم أثرية وأسواق.
الدرب الأحمر
اسم المنطقة بيرجع لحادثة مذبحة القلعة، بعد ما قتل محمد علي المماليك فى الوقت ده، ويُقال إن المنطقة اتملت بالدم واستغرقت فترة طويلة للتخلص من أثاره، وعلشان كده أُطلق عليها الدرب الأحمر .
المغربلين
اسم غريب أكيد فكرت قبل كده ليه اتسمى بالاسم ده، السبب إن المنطقة كان بيسكنها العطارين، واللي كانوا بيغربلوا عطارتهم علشان يزيلوا منها الشوائب، علشان كده اتسمت “المغربلين”.
حوش الغجر
منطقة موجودة ورا سور مجرى العيون ومكانها مش معروف بشكل كبير، وعلشان كده كانت بتيجي بعض القبائل الغجرية اللى كانت بتِطرد من الصعيد، يهربوا للقاهرة في محاولة اختفاء فترة، وييقيموا في المنطقة دي.
العباسية
من وقت ما أنشأ عباس حلمي الأول ثكنات للجيش في المنطقة سنة 1849، وهي اتسمت على اسمه “العباسية”، وكانت من أغنى وأجمل مناطق القاهرة وتم بعدها تعميرها وبناء مباني جديدة.
أثر النبي
اتسمت بالاسم ده علشان موجود فيها حجر قديم عليه شكل قدم، اعتقد الناس إنها آثار أقدام النبي محمد، وانتقل الحجر ده بعدها للجامع اللي الظاهر بيبرس وبنى فوق الحجر قبة.
حلوان
أنشأها عبد العزيز بن مروان سنة ٦٨٦ م، حسب اللي تم ذكره في كتاب “أصل الأشياء” واختار لها الاسم ده لإنه شاف إن المنطقة تشبه مدينة حلوان في العراق.
أسباب مختلفة مميزة وحكايات ورا تسمية شوارع القاهرة القديمة وأحيائها المشهورة، إيه تاني من الشوارع والأحياء بتفكر في سبب تسميتها؟