بعد تطويرهم وإعادة افتتاحهم مرة تانية، وجود متاحف في المطار، بقرب السياح اللي بيتوافدوا من كل مكان، معروض فيه آثار من مختلف العصور والحضارات اللي مرت بيها مصر، فكرة بتخدم السياحة بمفهوم مختلف وحضاري، وبتقرب السائح من تاريخ وحضارة البلد بكل سهولة، وتدفع فضوله لإنه يتعرف أكتر ويدور في تاريخ الآثار دي، حتى لو ماكانش مهتم بالسياحة الآثرية، مصر بتقرب الكل ليها بطرق مختلفة.
المتحفين تم تجهيزهم في مبنى الركاب رقم 2 ومبنى الركاب رقم 3 في مطار القاهرة الدولي، وتم افتتاحهم في اليوم العالمي للمتاحف، وبيضموا مجموعة من القطع الأثرية المختلفة الموجودة هناك، تم اختيارها من مخازن المتحف المصري في التحرير، والمتحف اليوناني الروماني، ومتحف السويس، بقطع من مختلف الحضارات العظيمة اللي صنعتها مصر، أهمهم، تمثال من البرونز للإلهة إيزيس المجنحة، وهي لابسة قرنين حتحور وبينهم قرص الشمس.
متحف مبنى الركاب رقم 3 بيضم 59 قطعة آثرية، تم اخيارها بعناية بواسطة اللجنة العليا للعرض المتحفي من مقتنيات مخازن المتحف المصري بالتحرير، والمتحف القبطي، ومتحف الفن الإسلامي، واللي بيرجعوا لعصور الدولة القديمة والوسطى والحديثة، ومن أهم القطع المعروضة، تمثال الكاتب المصري من الأسرة الخامسة، وقطعتين من عصور ما قبل الأسرات، ومجموعة مختلفة من التماثيل اللي من العصر اليوناني والروماني وتمثال الملكة حتشبسوت من الدولة الحديثة، وبعض القطع النادرة، وأيقونات قبطية من القرن الـ 18، وكمان مجموعة من العملات والمصاحف والأطباق المزخرفة اللي بترجع للعصور الإسلامية المختلفة. أما مقتنيات متحف مبنى الركاب رقم 2 اللي تم إنشائه حديثًا، بيضم 304 قطعة آثرية، بتبرز احتفاء المصري القديم بالعالم الآخر، وبتلقي الضوء على الملامح الفنية المختلفة للعصور المصرية.
