مشاوير ومواعيد كتير بنضطر نروحها وبتكون مش على مزاجنا وتقيلة على قلبنا لأسباب كتيرة جدًا وبعضها تبان أسباب مهمة وحقيقية وتستحق فعلًا وبعضها نفسية ومرتبطة بفوبيا، وبعضها مرتبط بموقف حصل معانا وقتها وخلق عقدة، بس رغم كل ده مضطريين إننا نروحها علشان نخلص مصالحنا والدنيا تمشي، مشاوير كتير منها مشوار الدكتور وشئون الطلبة، والسوبر ماركت والمصالح الحكومية ومشوار البنك.
مشوار الدكتور
الموضوع ده عندنا من واحنا صغيرين، فوبيا الدكاترة بكل أنواعها وخصوصًا دكتور الأسنان وقت الطفولة، ولما كبرنا ومشاكلنا كترت وبالتالي أمراضنا كمان كترت، فجأة لقيت نفسك بدل ما تروح لدكتور الأسنان بقيت تروح لدكتور نفسي، ولسه لحد دلوقتي بنتوتر وقت لما نحجز ميعاد للدكتور أو وقت لما نستناه في العيادة. يمكن العقدة دي اتربت عندنا في سن صغير لما كان بيحسسنا الدكتور وقتها إننا السبب في أي مشكلة بتحصل لنا بدافع الإهمال؟
مشوار الشوبينج
مشوار مالوش ملامح ماتعرفش هيبدأ إمتى وهينتهي إمتى، وبيرجع عليك في نهايته بمعاناة جسدية بتتكسح بعدها أسبوع في البيت، وبيبقى أسوأ كمان لو اللي اشتريته طلع مش مناسب فتضطر تروح ترجعه وده بيبقى أسخف وأسخف، ولو نزلت مع أهلك علشان يشتروا حاجة ليهم ففي الغالب بتشتغل لهم “شيال”، ولو هتجيب حاجة ليك هتلاقي كل واحد في العيلة بقى خبير أزياء وموضة في ثانية وبيتدخلوا في كل اللي هتشتريه، وفي الأخر هتلاقي نفسك جبت على زوقهم مش زوقك، فهو ليه يا جماعة مشوار الشوبينج من الأساس؟
مشوار المصالح الحكومية
“عَدي علينا بكرة” ، “اطلع عند مدام عفاف في الدور الخامس” أسخف وأشهر جملتين ممكن تسمعهم لو روحت أي مصلحة حكومية تخلص ورق ليك سواء ورق جيش أو باسبور أو شهادة، الشخصيات اللي بتقابلهم في الأماكن دي ممكن يتكتب عليهم كٌتب في فن التعامل مع الأخرين، بس من منظور تاني، هما تقريبًا مسئولين العطلة والتأخير في البلد، ولو عندك أي مشوار قريب هناك، استعد إنك تكرس حياتك ليهم في الفترة دي لحد ما تخلص ورقك.
الانترفيو
في مصر، اتعمل أول كتاب اسمه “ازاي تعدي من الإنترفيو”، الموضوع خد من مصر شوية حلوين، وفي كوميكس طلعت على الموضوع من كتر السخافات اللي ممكن يتعرض لها أي حد رايح يعمل إنترفيو، وفي الحقيقة انت لو روحت تعمل إنترفيو، كل اللي هتلاقيه قدامك شخص بيحاول يطلع عقده عليك اسمه الـ Hr، هيهبدك أسئلة مالهاش علاقة بأي حاجة في الدنيا، ولا ليها علاقة بالوظيفة اللي انت مقدم عليها أصلًا. زيّ الفوازير اللي بتتقال، والمطلوب منك إنك تعرفها علشان تعدي.
مشوار السوبر ماركت
ممكن مشوار السوبر ماركت يبقى سخيف لسببين، إنك تبقى رايح مش عارف الحاجة اللي عايز تجيبها، وبتروح وانت وحظك واللي هتلاقيه، أو إن يطلب منك تجيب حاجات مابتفهمش فيها، وتضطر كل شوية تعمل مكالمة لحد من أهلك وتسأله عن الحاجة دي، وفي الأخر بتخلي البياع هو اللي يكلمهم في التليفون. ولو روحت سوبر ماركت في دولة مختلفة، الموضوع بيبقى أصعب حتى لو في دولة عربية لإن أسماء الأكلات بتختلف من دولة لدولة.