بعد ما سمعنا كلنا أغنية حسين الجسمي “رمضان في مصر حاجة تانية والسر في التفاصيل”، ولإن مش رمضان بس اللي مختلف في مصر، دي أي مناسبة عمومًا سواء شم النسيم أو مولد النبي والعيد كمان، وده بيرجع لأسباب كتير منها وجود الدولة الفاطمية في مصر لفترة كبيرة، وده اللي خلى في مصر أي تاريخ مهم نعمل له احتفال وطقوس معينة.
وعلشان كده جبنالكم أهم الأسباب اللي خلت العيد في مصر مختلف عن أي مكان تاني.
أغاني العيد
احنا عندنا أي مناسبة في مصر بنعملها أغنية، فرح، سبوع، رمضان، شم نسيم، مولد النبي، عيد أم، عيد ثورة، ده حتى في نهاية رمضان عملنا أغنية اسمها “والله لسه بدري يا شهر الصيام” وهكذا، والعيد بقى بالذات مرتبط عندنا بأغنية صفاء أبو السعود ” أهلًا أهلًا بالعيد” ولحد دلوقتي ماتعملش أغنية على نفس المستوى أو الشهرة.
صلاة العيد
صلاة العيد في مصر ليها احتفال تاني لوحدها وتجهيزات خاصة، زيّ اللبس وزيّ “هنصلي فين السنة دي؟” وتجهيزات المساجد لاستقبال المصلين والهدايا اللي بتتوزع على الأطفال بعد الصلاة، وتكبيرات العيد اللي بتبقى في كل مكان حوليك وأنت في طريقك للمسجد و أنت راجع منه.
الكحك والبسكوت
تجهيزات الكحك والبسكوت زمان كان ليها روح وطقوس عند أجدادنا، هى قلِت طبعًا عن زمان بس لسه في ناس بتحب تعمل الحاجات دي في البيت بنفسها، حتى لو بطلنا نعملهم في البيت، بس مابطلناش ناكلهم أكيد، لإن الأكل من الطقوس المصاحبة لأي مناسبة عندنا، ومايعديش العيد طبعًا من غير الترمس والكشري والكحك والبسكوت والشاي باللبن.
المسرحيات والأفلام
ماينفعش المناسبة دي تعدي من غير ما نشوف مسرحية مدرسة المشاغبين، وسك على بناتك أو المتزوجون تلات مرات على الأقل، ده غير الأفلام اللي بتنزل في السينمات كل عيد.
العيدية
من الطقوس المهمة عند المصريين والأطفال بالذات إنهم ياخدوا العيدية كل عيد من الأهل والقرايب، ده غير الزيارات العائلية اللي بتتعمل بشكل أساسي والتجمعات اللي بتحسسك بفرحة العيد.