شوفنا مؤخرًا مسلسلات بتتكلم عن حياة الصعايدة، والسنة دي شوفنا مسلسل “نسل الأغراب” اللي رغم الانتقادات، اتفرج عليه ناس كتير، ولكن اتعمل عليه ميمز وكوميكس كتير، وحصل عليه جدل كبير على السوشيال ميديا في إن مش هي دي صورة الصعايدة الحقيقية، وبعد الجدل ده تجاه مسلسل “نسل الأغراب” ومسلسل “كل ما نفترق”، وإزاي جسدوا شخصية الصعيدي بشكل مختلف وملفت للإنتباه والسخرية في نفس الوقت، تعالوا نشوف السوشيال ميديا اتكلمت عن الموضوع إزاي.
نسل الأغراب
الناس على السوشيال ميديا انتقدت بشكل كبير طريقة أداء أحمد داش وأحمد مالك للدور الصعيدي وإن ملامحهم وتعبيرات وشهم مش لايق عليها سواء لما بيتعصبوا أو يتخانقوا، ولما بيتكلموا تحس إن اللهجة الصعيدية بتاعتهم متفبركة ومش سليمة. وبعض الانتقادات طالت المخرج محمد سامي لإن هو المسئول عن خروج الشخصيات للجمهور والشكل اللي بيأدوا به، خصوصًا إن داش ومالك مش أول مرة يمثلوا صعيدي، مالك عمل شخصية الصعيدي في الجزيرة 2، وداش كمان في مسلسل طايع، والاتنين أشاد بهم الجمهور، ليه بقى حصل كده السنة دي؟
كل ما نفترق
مسلسل اتعرض برضه لانتقادات كتيرة في الفترة الأخيرة وموجة من السخرية على ريهام حجاج بعد ما لبست الزي الصعيدي وكانت متنكرة وكانت بقصة! صعيدي بقصة إزاي! وردت بعدها ريهام حجاج على الكلام ده، بإن البنت ظهرت في أول حلقة ومعروف هي مين يعني مش مفاجأة، والحقيقة إن رد ريهام فتح برضه موجة من التعليقات على السوشيال ميديا.
والحقيقة مفيش أي عمل درامي طلع للنور وعلى الشاشة من فترة وكان بيتكلم عن الصعايدة وشكلهم وصورتهم الحقيقية حتى طريقتهم، وكان زيّ مسلسلات زمان واللي منها “ذئاب الجبل” و”الرحايا” و”أفراح إبليس” و”سلسال الدم” و”خالتي صفية والدير” و”الضوء الشارد”، مسلسلات طلعت صورة الصعيدي الطبيعي اللي بنشوفه في أي حتة من غير تشويه أو أي مزايدات على الشخصية أو إضافات مالهاش معنى.
وللأسف، معظم الأعمال اللي بتتقدم دلوقتي بتحاول تبين جانب معين من شخصياتهم، وبشكل سطحي زيّ فكرة الثآر أو تجارة المخدرات، وبعدوا عن فكرة البيت الصعيدي بتفاصيله وعاداته وتقاليده.