من أول أسبوع في رمضان، والناس كلها واخدة دور الناقد الفني اللي بيعين وبيدقق في أدق التفاصيل من أول الألوان والديكورات، لحد طريقة التمثيل. ولأن إحنا شعب sarcastic بطبعه، ماكانش غريب إننا نشوف سيول من الميمز على تقريبًا كل مسلسل بيتعرض دلوقتي سواء الناس حباه ولا لأ، بس الميمز بقيت ضريبة من ضرائب الشهرة دلوقتي! فتعالوا نشوف أشهر الميمز اللي اتعملت على مسلسلات رمضان السنة دي..
نسل الأغراب
أكيد كنتم عارفين إن المسلسل ده لازم يبقى أول عمل في القائمة بتاعتنا، مش كدة؟ تقريبًا ده أكتر مسلسل واجه انتقادات واتعمل عليه ميمز، من أول كحل أمير كرارة وسنان أحمد السقا، لحد طريقة التمثيل اللي شافها البعض مبالغ فيها وأحمد مالك وأحمد داش، اللي لسبب ما محدش مقتنع إنهم ينفعوا في دور صعايدة. لكن كل ده مايمنعش إن المسلسل محقق نسب مشاهدة عالية وإن في ناس مستمتعة بالفرجة عليه.
لعبة نيوتن
لعبة نيوتن من أكتر المسلسلات اللي أشاد بيها المتفرجين وتعتبر من أقوى المسلسلات المشاركة في السباق الرمضاني السنة دي، ولكن الناس بدأت تعمل ميمز مختلفة زىّ وجود تشابه بين الديكورات مع عمل كوميدي، وفكرة إن شخصية منى ذكي المتوترة في المسلسل نقلت قلقها لأى حد بيتفرج عليها.
ملوك الجدعنة
ملوك الجدعنة اتعمل عليه ميمز من نوع مختلف، أبرزهم فكرة إن رانيا يوسف ومصطفى شعبان كانوا طالعين كزوجين في مسلسل عائلة الحاج متولي، وبعد 10 سنين اجتمعوا تاني في مسلسل مع بعض كأخوات.. وطبعًا دي مش حاجة كانت الناس هتعديها بالساهل.
اللي مالوش كبير
أما مسلسل اللي مالوش كبير، الميمز كانت عن طريقة كلام أحمد العوضي في المسلسل وإن كل ما نجيب التلفزيون على قناة وشغال عليها المسلسل، نلاقي خالد الصاوي بيضرب فياسمين عبد العزيز بسبب وبدون سبب!
الاختيار 2
زى ما حقق الجزء الأول نجاح كبير، كان من نصيب الجزء التاني نفس نوع النجاح، وبالرغم إن الأحداث مؤثرة وقوية، ولكن برضه قدرت الناس إنها تتطلع الجزء الفكاهي من الموضوع.
حرب أهلية
بعد انتشار كوميكس “ده هاني” لفترة مش قليلة، كان الموضوع كوميدي إننا نشوفها محطوطة في نفس الموقف في مسلسل تاني علشان تعرف إحساس إياد نصار! زى ما قالوا الناس “لا نحب الشماتة ولكن يعجبنا الزمن حين يدور”.
