مع الموجة الواسعة من مسلسلات رمضان كل سنة، والزحمة سواء في كمية المسلسلات أو البرامج أو الإعلانات. بس بنقف برضه عند مشاهد معينة ونركز ونحلل خصوصًا على السوشيال ميديا اللي أحيانًا بتبقى عاملة زيّ الجلاد وتخسف بعمل الأرض، وأحيانًا ترفع منه. علشان كده جبنالكم قايمة من نجوم كوميديا رمضان اللي كانوا تريند اليومين اللي فاتوا بالمشاهد اللي أدوها وأثرت في كل واحد فينا وخرجوا من جدلهم والأدوار اللي متعودين نشوفهم فيها . تعالوا نشوف مين من النجوم في القايمة دي.
أحمد رزق
كان ضيف شرف لمدة حلقتين في مسلسل من مسلسلات رمضان السنة دي، فشوفناه في “القاهرة كابول”، اللي بيتكلم عن الإرهاب، والفنان أحمد رزق طالع بدور مخرج بيحارب التطرف والإرهاب بأفلامه، كان مشهد قتله على إيد أحد الإرهابيين مؤثر وخصوصًا آخر بصة بصها لصاحبه. يمكن اللي عمل تعاطف كبير معاه رغم دوره الصغير هو خفة الدم وروحه اللي طلعها في مشاهد بسيطة وبعفوية قبل موته مباشرة.
ماجد الكدواني
في مشهد من مسلسل “ولاد ناس” لما ابنه مات في حادثة المدرسة، المشهد كان مؤثر بكل تفاصيله سواء في التمثيل أو الحوار، في جملة مش هنقدر ننساها لما قالها للدكتور بعد ما عرف بموت ابنه وهي “أصل هو الصبح كان بيقولي أصل أنا يا بابا أنا مش أنا وأنا مش في حضنك، فأنا بس عايز أخش أقوله إن أنا مش هكون أنا وهو مش في حضني”، فتقدر تقول ماجد جيه يعمل عظمة في المشهد ده ويمشي بهدوء زيّ ما عمل قبل كده في فيلم “هيبتا” وغيره.
أشرف عبد الباقي
في مشهد الحلقة الرابعة من مسلسل “الاختيار 2” اللي اتصدر تريند من أول ما اتعرض، وخصوصًا الحلقة دي، الفنان أشرف في العادي، احنا متعودين نشوفه وهو بيضحك في أدواره وبيرسم البهجة على وشوشنا ويدينا أمل، ولكن في الحلقة دي، شوفناه وهو بيتسحل في مشهد مؤلم ومهين ومحزن وقت فض اعتصام رابعة والهجوم على القسم. العلاقة اللي ربطتنا بأشرف هى اللي خلقت الحالة من التأثر الشديد ساعة عرض المشهد، وكأنه والدك أو حد من قرايبك مش ممثل أبدًا.
محمد ثروت
قدر يثبت إنه ممثل من العيار التقيل ويقول “أنا هنا”، محمد ثروت بإيفيهاته اللي بتعلق مع الناس في أكتر من مسلسل كل سنة، لكن هنشوفه المره دي في مسلسل “بين السما والأرض” بشكل تاني. كان ماشي بمبدأ الضحك في كل الحلقات بس جيه عند الحلقة الخامسة وخلانا كلنا نعيط.