السنين الأخيرة شهدت نشأة كتير من منظمات حقوق المرأة وحركات نسوية كبيرة كان فيها محاولات مستميتة في إنها تشيل قيود وظلم كبير بيقع على البنات والسيدات.. ولإن كتير من الناس بتدعم المنظمات النسوية وطموحاتهم في إنهم يغيروا عادات ومفاهيم خاطئة عند بعض الأهالي العربية.. فلما تطلع شخصية عامة تبدي رأيها المعارض لبعض المؤسسات دي ومطالبهم، من المتوقع إنها تلاقي مدافع رشاشة من دفاع عن المنظمات دي وهجوم على رأيها. وده اللي حصل مع الفنانة الأردنية صفاء سلطان لما عبرت عن رأيها في “زواج القاصرات” في أحد البرامج التليفزيونية، فإيه اللي قالته أثار غضب بعض من المتابعين والجمهور خلال حوارها؟
خلال المقابلة، سألت المذيعة عن المنظمات النسوية اللي ضد زواج البنات الأقل من 18 سنة، ولكن قالت صفاء إنها ضد المنظمات دي، وإنها مش ضد زوج القاصرات طالما في “موافقة” على الزواج من البنات دول. وفي أول اللقاء أثناء سؤال المذيعة عن عدد زيجاتها، قالت الفنانة صفاء إنهم مرتين وإن أول زواج ليها كان زواج تقليدي تم وهي في عمر الـ17 سنة. وبعد إذاعة الحلقة وانتشار الفيديو، كتير من الناس هاجموها على تصريحاتها، ووصلت لإن البعض تجاوز بالكلام في حقها. ولكن صفاء طلعت وردت على الهجوم والتعليقات المسيئة اللي جاتلها فقالت في تعليق “أنا مابتهمني كداعم لأنك من الأساس مالك فهمان ولا سمعان شو حكيت، ما عم صدق الجهل وحالة النسخ لصق يلي ماشين عليها”.
