مشوار السينما دايمًا ليه طعم خاص، من أول ما تبدأ تفكر هتتفرج على إيه، لحد ما تحجز تذكرتك وتختار كرسيك المثالي.
الإضاءة الخافتة، الشاشة العملاقة، والصوت اللي محاوطك من كل اتجاه بيخلوك تعيش جو الفيلم وكأنك جواه.
ومهما كانت نوعية الأفلام اللي بتحبها، متعة السينما دايمًا لها سحرها الخاص!
ولو العيد بالنسبة لك يعني فيلم جديد وتجربة مختلفة، فأكيد لازم تختار السينما اللي تناسبك. بتحب الـ IMAX علشان الصورة تبقى أنقى والصوت يخطفك؟ ولا الـ VIP علشان الكراسي المريحة والفخامة؟ ولا السينمات العادية اللي فيها الحماس والناس والـ “هيصَة” بتاعة أول عرض؟
مهما كانت اختياراتك، في المقال ده هتلاقي كل اللي محتاج تعرفه عن أشهر وأحسن سينمات مصر، عشان تضمن تجربة سينمائية ممتعة تناسب ذوقك وميزانيتك.
جهّز الفشار واختار السينما اللي هتكون وجهتك الجاية!
لا تفوّت قراءة: أجمل “دويتوهات الحب” في دراما رمضان 2025.. ثنائيات خطفت قلوبنا
VOX سينما سيتي سنتر ألماظة – تجربة سينمائية ولا أروع!
لو عايز تجربة سينمائية مختلفة، فـ VOX سينما في سيتي سنتر ألماظة، شيراتون المطار، هتكون اختيار مثالي!
عندهم شاشات 2D و3D، وكمان قاعات Max، IMAX، وGold، بالإضافة لمنطقة ترفيه للأطفال.
أسعار التذاكر
التذاكر العادية بتبدأ من 120 لـ150 جنيه حسب توقيت الحفلة، وIMAX وMax أغلى بـ20 جنيه. أما قاعات Gold الفاخرة، فسعر التذكرة 255 جنيه.
عرض الـ Ladies Morning
من الأحد للخميس، من 10 صباحًا لـ2 ظهرًا، VOX بتقدم خصم 30% للسيدات، يعني تجربة سينما بسعر أوفر!
كيدز – سينما للأطفال!
VOX عندها كمان كيدز، وهي أول سينما مخصصة للأطفال في المنطقة، علشان يستمتعوا بعالم من الخيال!
تقدر تعرف التفاصيل وتحجز تذكرتك من الموقع الرسمي أو من خلال الخط الساخن 16002.
سينما سيتي ستارز – تجربة مختلفة في قلب مدينة نصر!
لو عايز تعيش تجربة سينمائية استثنائية، سينما سيتي ستارز في مول سيتي ستارز، شارع عمر بن الخطاب، هي المكان المناسب!
عندهم قاعات مميزة زي دايموند سينما دي بوكس، اللي بتجمع بين أحدث تقنيات العرض بالليزر والصوت بنظام Dolby Atmos، مع مقاعد متحركة بتكنولوجيا D-Box لأول مرة في العالم!
أسعار التذاكر
القاعات العادية (Standard) أو ( ستارز سينما) من 130 لـ150 جنيه، أما VIP وPremium VIP فبتوفر راحة أكبر مع مقاعد لاونج (ليزي بوي) وإمكانية تناول الأكل جوه القاعة.
والجولدن بتتراوح من 140لـ280 جنيه حسب الأماكن وهل هي premium VIP ولا لأ.
والدي بوكس بيتراوح من 140 جنيه حتى 200 جنيه حسب هتختار مقاعد متحركة ولا لأ.
خيارات العرض
متاح عندهم Standard, VIP, 3D, Premium VIP، ولو هتحضر حفلة 3D، محتاج تأجر النظارة بـ20 جنيه إضافي.
تقدر تحجز تذكرتك من الموقع الرسمي أو تزور السينما وتستمتع بالتجربة بنفسك!
سينما صن سيتي – تجربة سينمائية بأسعار مميزة!
لو بتدور على سينما في مصر الجديدة بأسعار مناسبة، سينما صن سيتي في مول صن سيتي، خلف مساكن شيراتون، هتكون اختيار كويس!
وبتوفر تجربة عرض 3D، لكن النظارة مش ضمن سعر التذكرة.
أسعار التذاكر:
العادية بتبدأ من 70 لـ100 جنيه، أما قاعات VIP فسعرها 160 جنيه، وبيقدموا عروض مخفضة يوم الإثنين والثلاثاء.
وتقدر تتواصل معاهم على 02 22689601 أو تزور صفحتهم الرسمية للحجز ومعرفة أحدث العروض!
سينما داون تاون Renaissance – سينما على قد الإيد!
لو عايز تجربة سينما بسيطة ومن غير تكاليف عالية، سينما داون تاون Renaissance في وسط البلد، 8 شارع عماد الدين هتكون خيار مناسب ليك.
السينما بتوفر شاشات Standard، وفيها 3D لكن مفيش IMAX أو 4DX. وأسعار التذاكر تبدأ من 90 جنيه، ودي من أرخص السينمات في وسط البلد بس في العيد بتوصل لـ110 جنيه.
تواصل، ممكن تكلمهم على:
02-25798367 | 02-25798391 | 01065530854
أو تشوف كل التفاصيل عن الفروع التانية في الإسكندرية، الرحاب، وبنها من خلال صفحتهم الرسمية!
لا تفوّت قراءة: علي البيلي في لام شمسية: موهبة نضجت في هدوء وأبدعت في صمت
سينما جرين بلازا – تجربة سينمائية بستايل مختلف!
في قلب مول جرين بلازا، سموحة، الإسكندرية، هتلاقي السينما وسط ديكورات مميزة وعربيات قديمة، وده بيخلي المكان مثالي للتصوير خصوصًا بعد التجديد الأخير.
من أوائل السينمات الـ VIP في إسكندرية! الأسعار بتختلف حسب نوع الفيلم ووقت الحفلة، لكن المتوسط:
- 120 / 130 / 150 جنيه
- VIP بـ 250 جنيه
للحجز والاستفسار: 034209155 – 034209154
وتقدر تشوف فيديوهات للمكان من الداخل من خلال صفحتهم الرسمية!
سينما جلاكسي المعادي – تجربة سينمائية متكاملة!
في كورنيش النيل، أبراج عثمان، السينما دي مش بس مكان للأفلام، لكن كمان فيها مطعم بديكورات خيالية، هتحس إنك في عالم مختلف تمامًا.
تجارب العرض المتاحة:
- قاعات 3D لمشاهدة الأفلام بأعلى جودة
- Dine-in لو عايز تاكل وسط التجربة السينمائية
- منطقة مخصصة للأطفال علشان يستمتعوا بأفلامهم المفضلة
للحجز والاستفسار: 0115918825
وتقدر تشوف تفاصيل أكتر عن المكان من خلال صفحتهم الرسمية!
سينما وكافيه جراند نايل تاور – تجربة فاخرة على ضفاف النيل!
الموقع: داخل فندق جراند نايل تاور (جراند حياة سابقًا)، جاردن سيتي – كورنيش النيل، جنب مستشفى القصر العيني القديم.
المزايا:
- سينما وكافيه في نفس المكان لتجربة استثنائية
- موقف سيارات لركن عربيتك بسهولة
- أجواء مثالية للكابلز وخروجات رايقة
الحجز: ممكن تحجز التذكرة أونلاين من موقع TAZKARA2GO أو تتواصل معاهم على الرقم 01014335011!
لا تفوّت قراءة: كيف نجح مصطفى غريب في التسلل إلى قلوب الجماهير؟ السر في خلطة الكوميديا
سينما سان ستيفانو – تجربة فريدة في قلب الإسكندرية
لو بتدور على سينما مميزة في الإسكندرية، سينما سان ستيفانو في المول هي الاختيار المثالي.
أسعار التذاكر ثابتة لكل الحفلات: العادية بـ125 جنيه، والبريميم والـD-Box بـ150 جنيه. أما النظارة الـ3D فسعرها 35 جنيه.
عشان الحجز، تقدروا تتواصلوا على 01065530865 أو (03)4690057. بس خليكوا عارفين، الأطفال تحت 4 سنين مش مسموح دخولهم.
للمزيد من التفاصيل، زوروا الموقع الرسمي وعيشوا تجربة سينمائية استثنائية!
سينما مترو – سحر الزمن الجميل في قلب وسط البلد
لو زهقت من السينمات الجديدة وعايز تعيش أجواء الزمن الجميل، سينما مترو هي المكان المناسب.
من أقدم السينمات في وسط البلد، افتتحت سنة 1940، وأول ما تدخلها هتحس كأنك جوه فيلم من السبعينيات.
الموقع في شارع طلعت حرب، وللاستفسار عن الأسعار كلمهم على 0223937607. متقلقش، الأسعار في متناول الجميع!