حلويات عيد الفطر 2025 السنة دي غير! كل سنة بنفتكر إن الكحك والبسكوت خلصت حكايتهم، لكن في ناس مصممة تفاجئنا!
من كحك الماتشا لدونتس الغريبة باللوتس، الحلويات بقت تاخد شكل ونكهة جديدة كل عيد.
السؤال هنا: التجديد ده إضافة لذيذة ولا مغامرة مالهاش لازمة؟ تعالوا نشوف أحدث افتكاسات حلويات عيد الفطر 2025، وقرروا بنفسكم، هل هتجربوا الجديد ولا الكلاسيك يكسب؟
لا تفوّت قراءة: رحلة الشيف بوراك نحو القمة: لماذا أسعار مطاعمه باهظة الثمن؟
كحك الكاندي والريد فيلفت – تسيباس بيجدد العيد!
تسيباس مكمل في افتكاسات العيد وداخل بقوة بكحك الريد فيلفت! مزيج من طعم الشوكولاتة الخفيف مع لمسة من الفانيليا والكريمة
أما كحك الكاندي، فمتزين بقطع فواكه مجففة، وشكله أشبه بميني بيتزا سويت، وهيكون مفاجأة لأي حد متعود على الكلاسيك!
كحك الماتشا.. للجرأة أصول!
الماتشا بتدخل حياتنا من غير استئذان، زي الفستق والبستاشيو بالظبط! بس كحك باللون الأخضر ورشة سكر خضرا؟ ده تحدي!
شَكله غريب، لكن مغري لأي حد بيحب يجرب حاجات جديدة.. يا ترى كحك المستقبل ولا مجرد موضة وهتعدي؟
لا تفوّت قراءة: افتكاسات الكنافة في رمضان 2025: هتحلي بالملفوفة ولا هتغرق في القلقاس؟
كحك الكراميل – رايح بينا على فين يا كحك!
من برا شكله زي حبات اللؤلؤ الدهبية، ومن جوا الكراميل السايح بيهمس لك “تعالى كلني حالًا”! لو الطعم زي الشكل، يبقى اكتساح!
تسيباس فاجئنا بالاكتشاف ده، وتقدروا تشوفوا ريفيو من هنا وفيديو عملي من هنا، والبوكس الكبير بـ345 جنيه، والصغير بـ145 جنيه.
دونتس غريبة لوتس – الحلو لما يتدلع!
دونتس مغلفة بالشوكولاتة البيضاء وعليها خطوط زبدة اللوتس، ومتزينة بقطع غريبة اللوتس عالوش! مزيج فاخر بين الغريبة الناعمة وسبريد اللوتس.
العبد بيقدم القطعة بـ35 جنيه، بس السؤال هنا: هل واحدة هتكفي ولا هنحتاج 15؟
مشكلتة تويست .. وللسكر بقية!
كوكيز غرقانة في صوص الشوكولاتة وعليها قطع شوكولاتة، حرفيًا اسمها مش هزار!
ممكن تمخمخ بيها مع شاي باللبن، أو تاكلها لوحدها وتكتفي بجرعة السكر دي لحد العيد الجاي!
30 قطعة بـ180 جنيه.. بس السؤال: هتقف عند واحدة؟