قمرين دول ولا عينين؟ لأ قمرين بشهادة العلماء اللي قالوا أن الكرة الأرضية على ميعاد مع مفاجأة كونية الخريف ده، فبدل ما يبقوا قمر هيبقوا “اتنين” طب ازاي الكلام ده؟
اتقال أن متوقع دخول كويكب صغير إلى مجال تأثير جاذبية الأرض، وهيبقى قمر صغير بشكل مؤقت وهيفضل موجود الزائر الفضائي ده في مدار الأرض من تاريخ 29 سبتمبر لحد كام شهر قبل ما يتحرر من تأثير الجاذبية.
بس للأسف القمر الثاني ده هيكون صغير جدًا وضوءه خافت وبالتالي مش هتقدر تشوفه بالعين المجردة، وهيحتاج تيلسكوب احترافي، وبيوصل قطر الكويكب حوالي 10 أمتار وهو صغير مقارنة بقمر الأرض، اللي بيبلغ قطره حوالي 3474 كيلومتر.
وقالت الدكتورة جينيفر ميلارد، عالمة الفلك أن الكويكب مش هيتم دورة كاملة حول الأرض، مجرد بس هيتغير مداره وهينحرف بسبب تأثير كوكبنا وبعدين هيكمل في طريقه.
ولو فاتتك الفرصة أنك تشوف القمر الجديد ده هتقدر تعوضها بعد ثلاثين سنة، لأن العلماء بتتوقع أنه يرجع لمدار الأرض مرة تانية في عام 2055.
ودي مش أول مرة يتم رصد فيها أقمار صغيرة سبق وقبل كده مرت من غير مايلاحظها حد وزارت مدار الأرض أكثر من مرة، ومنهم كويكب “2022 NX1” اللي عدى على مدار الأرض سنة 1981، ورجع في 2022.
آخر كلمة: ماتفوتوش قراءة: مسجد سانجاقلر: تحفة معمارية فريدة تنقلك لعالم روحاني آخر