6 لاعيبة مصرية جابوا الفخر لمصر في الألعاب البارالمبية، أخرهم هاني عبد الهادي

بعد ما سمعنا في الساعات اللي فاتت إن اللاعب هاني عبد الهادي فاز ببروزية رفع الأثقال لوزن 88 كجم في بارالمبياد طوكيو وبكده يبقى جاب لمصر الميدالية السادسة. البطولة لسه ماخلصتش بس حبينا نتكلم عن الخمسة اللي أحرزوا ميداليات وجابوا الفخر لمصر. ومستنين ميداليات أكتر من كل أولادنا من البعثة المصرية.

شريف عثمان

بعد فوزه بتلات ميداليات ذهبية في الدورات اللي فاتت، حقق الدورة دي فضية طوكيو في رفع الأثقال، وده رغم إصابته واللي خلاه يبكي لإنه ماحققش نفس الإنجاز السنة اللي فاتت .. بس إحنا فخورين بيه في أي حال من الأحوال.

رحاب أحمد

قدرت تحطم رقم قياسي وترفع 120 كيلو، وفازت بفضية رفع الأثقال في وزن 50 كيلو.

محمود عطية

نجح إنه يحقق المركز التاني والميدالية الفضية في منافسات وزن تحت 72 كيلو رجال.

فاطمة عمر

فازت بفضية في وزن 67 كيلو، ودي تعتبر الميدالية رقم 6 لفاطمة في تاريخها في البارالمبياد، وده بعد ما حققت قبل كده 4 ميداليات ذهبية في سيدني وبكين ولندن في 2000 و2004 و2008 و2012 وفضية ريو في 2016.

محمد صبحي

جاب برونزية رفع أثقال في وزن 80 كجم، وكان قريب من إنه يحقق الميدالية الفضية، بس أخفق في المحاولة الأخيرة واللي كان المطلوب فيها رفع 216 كيلو جرام.

ومانقدرش ننسى اللاعب المصري إبراهيم حمدتو لاعب تنس الطاولة واللي خطف كل الأنظار والصحف العالمية رغم خسارته أمام منافسه الكوري كاي هونج، ويعتبر هو اللاعب الوحيد اللي بيلعب تنس الطاولة بفمه، وبمساعدة “قدمه”، وأول لاعب مصري يظهر كشخصية أنيمي جنب الدمية سوميتي في مقطع ترويجي للعبة تنس الطاولة (فردي رجال).

أما عن البعثة المصرية، فبتشارك بـ49 لاعب ولاعبة بـ8 ألعاب مختلفة وهي: رفع الأثقال والسباحة وتنس الطاولة وألعاب القوى والريشة الطائرة والباراتايكوندو وكرة الهدف للسيدات. وشوفنا في حفل الافتتاح رفع العلم المصري عن طريق الثنائي: فاطمة عمر بطلة رفع الأثقال وهشام صلاح لاعب منتخب الكرة الطايرة جلوس.

أخر كلمة: ماتفوتوش قراءة: إبراهيم حمدتو لاعب مصري خطف كل الأنظار في الألعاب الباراليمبية

تعليقات
Loading...
Tweet
Share
Share
Pin