5 مصايف تحفة في مصر لازم تزورها في صيف 2021

الصيف جي وكلنا مش قادرين نستنى ناخد الأجازة ونطلع البحر نبلبط ونفك شوية. بس زهقنا من المصايف التقليدية زيّ دهب والساحل الشمالي وشرم الشيخ والغردقة والحاجات دي كلها، علشان كده جبنالك 5 مصايف مختلفة ممكن تزورها الصيف ده وهتنبسط جدًا. المصايف دي بتكون هادية ومفيهاش ناس كتير، وجوها تحفة والمناظر الطبيعية اللي فيها ماحصلتش.

يلا نبدأ نتكلم عن أجمد 5 مصايف لازم نزورهم الصيف ده!

1. هدوء وسحر وجمال طابا

طابا في شرم الشيخ بس مختلفة تمامًا عن أي حاجة شوفتها أو عملتها في شرم الشيخ. فيها طبيعة جبلية خلابة، تقدر تطلع الجبال وتعمل كامب وتتفرج على النجوم هناك، غير إن الجبال ألوانها مدهشة والمناظر الطبيعية فيها جميلة جدًا.

كمان تقدر تنزل شواطيء مختلفة وكل شاطيء فيها أحلى من التاني، الرملة ناعمة والمياه صافية والبحر هادي وبجد حاجة تحفة جدًا. وعندك قلاع قديمة في وسط البحر منظرها تحفة، زيّ قلعة صلاح الدين، مش هتندم إنك زرتها خالص.

وعندك قلعة زمان اللي اتبنت على تبة في الجبل، وبتطل على خليج العقبة في أرض الفيروز، المكان هيحسسك إنك ملك من القرون الوسطى مع الأكل المميز والمناظر التحفة والإقامة الملكية.

2. العلمين الجديدة

العلمين الجديدة لسه بتفتح ومفيش ناس كتير بتروحها. المدينة جديدة ومصممة بحيث تكون سحر ساحلي متكامل. الشواطيء فيها لسه جديدة ونضيفة جدًا وهادية والمدينة فيها حياة ليلية جميلة ومولات ومطاعم، يعني الصبح على البحر وبالليل عايش حياتك ومبسوط وسط المدينة.

3. مرسى علم

مرسى علم تمتاز بشواطيء جميلة وبحر صافي وعلشان كده اسمها مالديف مصر. لو بتحب الغوص هتنبسط جدًا بشواطيء مرسى علم اللي عايش فيها أكتر من 5 ألاف دولفين بالذات في شاطيئ بيت الدولفين، ده غير شعاب شرم وشعاب وادي الجمل.

ولو ليك في السفاري هتلاقي جزر تحفة زيّ جزيرة الزبرجد وجزيرة خوار وجزيرة الروكي وشهاب الفستون. أما بحيرة النيزك فدي حكاية لوحدها، في نيزك نزل على الأرض وعمل البحيرة الجميلة دي، المياه زرقا وصافية جدًا والمنظر كله تحفة.

4. مدينة الجلالة الجديدة

المدينة الجديدة اللي فتحت قريب من العين السخنة وفي قلب جبل الجلالة بقيت واحدة من أجمل وجهات المصايف. ولإن المدينة جديدة هتلاقيها هادية ومش زحمة خالص ولسه الناس ماعرفتش طريقها.

المدينة فيها منتجع بيتكون من فندقين ضخمين جدًا، واحد في الجبل وواحد على البحر، والاتنين أحلى من بعض. وفي تلفريك بيربط ما بين الجزء اللي تحت من المدينة وبين الفندقين اللي فوق الجبل. وكمان فيها مدينة لليخوت وأكوا بارك ومول كبير جدًا ومطاعم وبلازا. يعني هتنبسط من كل ناحية وهتلاقي ألف حاجة تعملها علشان تستمع بالمكان.

5. راس البر

راس البر كانت زمان واحدة من أهم المصايف في مصر وكانت بتبقي زحمة جدًا، في الوقت الحالي الناس نسيت المدينة خالص وماعادش ناس كتير بتروح وده اللي خلاها دلوقتي هادية وجميلة جدًا.

يمكن الشواطيء في راس البر مش أقوى حاجة لكن جو المدينة جميل جدًا، فيها شارع النيل اللي مليان قهاوي وكازينوهات وبيوت جميلة ومليان أجواء دافية وقديمة.

وهتلاقي اللسان اللي عند المنارة وده طريق داخل جوا البحر ومن هناك هتشوف منظر جميل جدًا لالتقاء ماء البحر مع ماء النيل.

أخر كلمة: ماتفوتوش قراءة: “حلم ده ولا خيال”.. كل اللي محتاجين تعرفوه عن بحيرة النيزك الفيروزية بمرسى علم

تعليقات
Loading...
Tweet
Share
Share
Pin