120 فنان في شوارع وسط البلد: جولة سياحية من “حي القاهرة الدولي للفنون”

امبارح كنا في جولة فنية في قلب وسط البلد، مع 120 فنان من جنسيات مختلفة، في 5 معارض كلهم في قلب العاصمة، وفي أكتر مكان حيوي وبيجمع بين التاريخ والمستقبل.

انطلاق النسخة التانية من “حي القاهرة الدولي للفنون” بتنظيم “Art D’Égypte” بمشاركة 100 فنان مصري و20 فنان أجنبي من بلاد مختلفة، بيطوفوا بفنهم شوارع وسط البلد وبيتعرفوا على فنون وثقافات معاصرة، مزيج من الفن المعاصر اللي بيتيح فرصة للمتفرجين من كل مكان، ومش محدود في معارض فنية بتذاكر أو شروط، لأ ده متاح في شوارع العاصمة لكل اللي بيحب الفن علشان يشارك. المعرض مستمر لحد يوم 30 أكتوبر في سينما راديو.

الجولة ابتدت في “Founders Space”، أول ما تدخل هتشوف فنانين ومحبين للفن، متجمعين في مكان واحد علشان يكتشفوا ويشوفوا فنون مختلفة من مذاهب مختلفة، ابتدينا الجولة بلوحات لـ 24 فنان من جنسيات مختلفة، قابلنا الفنانة “نادين عبد الغفار”، مؤسسة Art d’Égypte، واتكلمنا معاها عن النسخة التانية من حي الفنون، قالت لنا: “اخترنا أماكن مختلفة السنة دي، وأضفنا حاجة جديدة، إننا نسقنا معاهم علشان يكون عندنا تنوع أكتر في الفنانين، احنا عندنا 100 فنان مصري شاركوا خلال شهر، وعندنا 20 فنان أجنبي من دول مختلفة، وحبينا نختار وسط البلد علشان الناس تحس إنها ممكن تشارك عادي من غير شروط، أي حد موجود في الشارع يقدر يدخل يتفرج على الأعمال الفنية، ده غير إننا حبينا إن يبقى في حركة في وسط البلد وأنشطة مختلفة والناس تحس بوجودنا”.

إيه المختلف في حي الفنون السنة دي؟ نادين قالت لنا: “في معارض كتير بتكون محدودة، يعني مثلًا مانقدرش نعرض لأكتر من 10 فنانين، فاحنا في أقل من شهر بنعرض لأكتر من 100 فنان ومن جنسيات مختلفة، في أماكن متاحة لكل الناس، وفرصة لفنانين كتير إنهم يشاركوا في المعرض سواء فنانين مبتدئين أو فنانين كبار”.

“الفكرة اللي بدأنا بيها في Art D’Égypte من 2017، في المعرض اللي نظمناه في المتحف المصري في التحرير، هي إننا نعزم فنانين من دول مختلفة في العالم، علشان ييجوا يتفرجوا على الفن المصري والفنانين المصريين في أرضهم وفي بيتهم، عكس اللي بيتم عادةً، إن احنا اللي بنروح نعرض في بلاد مختلفة، والسنة اللي فاتت معرض “الأبد هو الآن” اللي عملناه في منطقة الأهرامات كان له صدى كبير، أكتر من 800 منصة إعلامية في العالم اتكلموا عن المعرض”.

عن: ahram

اتكلمنا كمان مع “باولا أنطا” الفنانة التشكيلية الأسبانية، اللي قالت إنها استمتعت بالتعرف على مصر، وكلمتنا عن نفسها وعن اللوحة اللي بتشارك بها في المعرض.

باولا قالت: “أنا جيت من أسبانيا علشان أشارك في Art d’Égypte، لإني بحب الفن نفسه إنه بيحسسني بالحرية، أنا كمان بحارب علشان أحصل على الحرية دي في حياتي” وكملت: “أنا كمان بحاول أتبسط بالفن وباللي بعمله، برسم وألون وأتبسط، وبحس إني في عالمي الخاص اللي بصنعه بنفسي”.

كملت باولا كلامها وقالت “أنا جيت هنا لإني بحب أجرب وأعيش تجارب مختلفة وأكتشف فنون مختلفة، كل واحد عنده طريقة تفكير ومشاعر وخلفية وثقافة، بحب أتعرف على ناس مختلفة ونتشارك الثقافات دي، ونتشارك وجهات نظر مختلفة، وده اللي لقيته في مصر”.

ومن مصر، اتكلمنا مع نورا بركة، اللي شاركت مع Art D’Égypte للمرة التالتة، قالت لنا: “أنا بحب أشارك مع Art D’Égypte في معرضهم، لإنهم بياخدوا مستويات العرض لمكان أحسن ومختلف، وبتكون تجربة مختلفة عن المعارض الفنية بشكلها العادي، وبنقدم لناس مختلفة بأعمار مختلفة، طاقة كبيرة جدًا الواحد يستغلها لشغله.. أما عن اللوحات اللي بشارك بيها، فأنا اعتمدت إني ألفت الانتباه لحب الأشياء الصغيرة في حياتنا، لإن هي دي اللي فيها متعة الحياة، ودي اللي بتستمر مهما الظروف اختلفت، والألوان اختيارها كان عفوي حسب الانفعال باللوحة”.

حي القاهرة الدولي للفنون مش مقتصر على اللوحات الفنية، لكن على الفن المعاصر بأشكاله المختلفة، من وجهات نظر فنانين بخلفيات وثقافات مختلفة، تقدر تشوف كل ده على مدار شهر أكتوبر في سينما راديو في وسط البلد.

آخر كلمة: ماتفوتوش قراءة: معرض فني في قلب الجمالية: محمود مرعي بينقل الفن المعاصر جنب الآثار القديمة

تعليقات
Loading...
Tweet
Share
Share
Pin