مصر معروفة إنها مكان مميز للسياحة بكل أنواعها، وغير الآثار اللي منفردة بامتلاكها، والأماكن السياحية الكتير المعروفة فيها واللي بتكون دايمًا وجهة السياح، لسه مصر فيها أماكن جميلة مش معروفة ومش واخدة حقها على خريطة السياحة الخارجية أو الداخلية، أماكن بتختلف أنواع السياحة فيها سواء آثرية أو علاجية وكمان ترفيهية، فتعالوا نشوف 10 أماكن ماينفعش تفوتهم للسياحة في مصر.
محمية وادي الجمال
موجودة في جنوب مرسى علم في محافظة البحر الأحمر، واتسمت بالاسم ده علشان فيها نباتات بيحبها الجمال، فكانوا الرعاة بيلاقوا الجمال الشاردة بتتجمع هناك، والبعض بيطلق عليها “وادي الجمال التايهة”.
محمية كهف وادي سنور
عن: الوطن الأكبر 
عن: اليوم السابع
بيطلق عليه إنه أقدم كهف في العالم، وموجود في بني سويف، وعمره بيتخطى 40 مليون سنة وممكن تدخله وانت مطمن علشان هو محمية طبيعية ومزار سياحي، بيمتد لحوالي 700 متر في باطن الأرض بعمق 15 متر، هتقدر تستمتع بجمال المكان الفريد من نوعه.
غرود أبو محرق
عبارة عن سلسلة جبال رملية ضخمة في طريق كهف الجارة، وتُعتبر نهاية حدود بحر الرمال الأعظم في الصحراء الغربية، وهي من أجمل وأروع مناطق التخييم في الصحراء، وهيكون مكان مميزة ليك لو انت بتحب تخيم في الصحراء.
الصحراء السوداء
موجودة في شمال الصحراء البيضاء، واتكونت بسبب تآكل الجبال اللي بتغطي سطح الصحراء بطبقة من المسحوق والصخور السوداء، وعلشان كده اتسمت الصحراء السوداء، وفي نهايتها كمان تلال بركانية، لو انت من الناس اللي بتحب التخييم أو أنشطة السياحة في الصحراء، هتكون مغامرة مختلفة ليك لو زرت الصحراء السوداء.
جبل الكريستال
جبل جوا الصحراء البيضاء، صخوره عبارة عن قطع من الكريستال، يعتبر مدخل وبداية محمية الصحراء البيضاء، تخيل إنك تشوف جبل مكون من كريستال وانت بتخيم في الصحراء، ماتفوتش مغامرة زيّ دي.
مقبرة باننتيو
هي مقبرة في واحة الباويطي بالواحات البحرية منحوتة في الصخر من الأسرة 26، مكان مميز ليك لو انت بتحب السياحة الآثرية وعايز تكتشف مكان جديد مش كل الناس تعرفه.
خليج فيورد
مكان جميل موجود على مسافة 15 كيلو متر من طابا، وهو مكان للغطس، ومشاهدة الشعاب المرجانية وجمال الطبيعة، لو انت من هواياتك الغطس والبحر، وعايز تستمتع بمكان مش زحمة، بننصحك تروح خليج فيورد.
جبل المدورة
في الفيوم، عبارة عن هضبة مرتفعة على شكل دائرة، وكمان فيه بحيرة بين الهضاب اللي حواليها، والمكان فيه مناظر طبيعية مميزة هتتبسط لما تزورها.
البحيرة المسحورة
في محمية رأس محمد في جنوب سيناء، واتسمت بالاسم ده علشان بيتغير لون المياه 7 مرات حسب ضوء الشمس، وده بسبب إن فيها كمية كبيرة من المعادن اللي بتساهم في علاج الأمراض الروماتيزمية.
هرم ميدوم
هرم ميدوم موجود في مدينة ميدوم بمحافظة بني سويف، على بعد حوالي 90 كيلو متر جنوب غرب القاهرة، وهو أثر غريب، يعني هو يبان كهرم مدرج، ولكنه متغطي من الخارج، ويعتبر أول هرم كامل وهو أقدم من أهرامات الجيزة.