بالرغم من شكوانا اليومية على تصرفات المصريين وطريقة تعاملهم، إلا إننا كلنا مقتنعين إن مفيش شعب صافي القلب والنية وفريد من نوعه زي الناس في مصر. الناس اللي عايشين بره تحديدًا بيفتقدوا الابتسامات الدافية والطبيعة المحبة اللي بتتميز بيها البيئة المصرية. دي بعض الصفات اللي موجودة بكثرة عند المصريين:
خفة الدم
المصريين معروف عنهم شخصيتهم وروحهم الخفيفة. حتى أسوأ المواقف وأكثرها توترًا بتلاقي المصري بيعمل نكتة عليها. هما أحسن ناس بيحوّلوا الحزن لمصدر للضحك ولما حدث كبير بيحصل في البلد المصريين بيكونوا أول ناس يعملوا نكتة من مشاكلهم ومعاناتهم.
الكرم
المصريين هم أكتر ناس كريمة في العالم كله، ممكن يتخانقوا ساعة على مين يدفع الحساب! لو بتزور واحد مصري في بيته اتأكد إنه هيقدملك كل الأكل والشرب اللي عنده في البيت.
حسن الضيافة
لما المصري بيشوف أي أجنبي سائح في الشارع دايمًا هتلاقيه بيرحب بيه تلقائيًا كده. لو بالصدفة قابلت جارك على باب البيت هيعزمك جوا عنده تشرب حاجة أو حتى تتعشى، وبدون مقدمات.
الشهامة
الرجالة المصريين معروف عنهم الشجاعة، الجدعنة والشهامة، حتى نانسي عجرم في أغنيتها “لو سألتك انت مصري” لقبتهم بملوك الجدعنة.
التفاؤل
المصريين دايمًا عندهم نظرة متفائلة للحياة وبيحسّوا إن دايمًا بكرة هيبقى أحسن.
الإيمان
المصريين شعب مؤمن جدًا ومتدين، بيفكروا في ربنا طول الوقت، وبيسيبوا كل حاجة عليه.
روح المساندة
دايمًا المصريين بيقفوا جنب بعض في الحلوة والوحشة. سواء كان عزاء أو فرح، دايمًا هيكونوا موجودين معاك بيشاركوك اللحظة.
الطيبة
المصريين هما أكتر شعب طيب، متسامح ومتعاطف في العالم.
الثقة
المصريين عندهم ثقة كبيرة في نفسهم، وعندهم حق؛ فالتاريخ المصري القديم هو أعظم تاريخ لدولة على وجه الأرض.
البطولة
المصريين معروفين بشخصيتهم الشجاعة، وأكبر دليل على كده هو الثورتين الأخيرتين اللي المصريين قاموا بيهم في خلال 4 سنين بس.