اليوتيوب النهارده هو واحد من أهم منصات السوشيال ميديا، وبنلاقي عليه محتوى متنوع جدًا، لإن كل واحد يقدر يعمل قناة على اليوتيوب ويقدم عليها كل اللي هو عايزه، بس في فرق بين محتوى هادف أو ممتع، ومحتوى مش بيقدم أي حاجة للمتابع، وعلشان كده عملنا لكم قائمة بأهم 10 قنوات على اليوتيوب بيقدموا محتوى عربي ممتع وهادف ومتابعته هتضيف حاجات كتير لكم. يلا نبدأ!!
الدحيح: أشهر حاجة على اليوتيوب العربي
واحد من أهم الناس اللي بتعمل محتوى علمي بسيط pop science، وبيوصل أفكار علمية كبيرة ومعقدة بطريقة مبسطة للناس العادية اللي مش عندها خلفيات أكاديمية أو علمية كبيرة. وبيتكلم في كل حاجة، من التاريخ للعلوم بأنواعها والفن والسياسة والطب وعلم النفس والفلسفة.
بيقدم المحتوى بتاعه بطريقة ممتعة وجذابة، وبيستخدم فيه الكوميديا اللي بتخليه خفيف على القلب وسهل، ومن أجمل الحاجات اللي بتميز المحتوى بتاعه إنه مدروس كويس ومدعوم بمراجع مهمة وقوية، وبيوضح المراجع بتاعته في الحلقة وبيسيب اللينكات بتاعتها في الكابشن بتاع الفيديو علشان لو عايز ترجع لها وتتأكد بنفسك من دقة الكلام اللي هو بيقوله.
المراجعة النهائية: من ألذ الحاجات على اليوتيوب
بيقدم محتوى مختلف ومتنوع، وبيتكلم دايمًا عن الحاجات اللي بتشغل المجتمع المصري، ورغم إن مافيش فئة معينة من المحتوى بيركز فيها، لكن المحتوى بتاعه دايمًا جذاب وممتع، وفيه معلومات جديدة ووجهة نظر مختلفة بيضيفها للمتابع، وهتلاقيه بيراجع موضوعات مهمة ومختلفة زيّ سد النهضة والأفلام الموسيقية، وبيراجع أشخاص زيّ محمد هنيدي ومحمود سعد، وكمان أغاني زيّ أغنية عبدالحليم حافظ “فاتت جمبنا”.
من أجمل الحاجات اللي بتميز المحتوى بتاع المراجعة النهائية، غير إنه جذاب وسلس ودمه خفيف وبيتكلم بطريقة مختلفة، إنه كمان مُرتب ومُنظم والفيديو بيعرض وجهة نظره في الموضوع اللي بيناقشه بطريقة مهندمة تخليك تفهمها أكتر وتقدر تدي وجهة نظرك الخاصة في الموضوع.
محمود سعد
المذيع المصري الجميل محمود سعد، اللي قدم لنا برامج كتير مهمة زيّ باب الخلق والبيت بيتك، بيعمل فيديوهات ممتعة وقريبة من القلب على قناته على اليوتيوب، واللي بتناقش مواضيع كتيرة ومختلفة، ومعظمها من الشارع. والمحتوى بتاعه بيجمع ما بين حكايات شخصية وفنية، وبيزور أماكن تاريخية ويتكلم عنها، وبيعمل لقاءات مع شخصيات مهمة وناس عادية.
اللي بيميز المحتوى بتاعه هو إنه بسيط، وإن محمود سعد سلس جدًا في تقديم المحتوى، وتحسه ابن بلد وقريب من القلب، والمواضيع بتاعته كلها مصرية وعادية جدًا، بس جذابة وممتعة.
فيلم جامد
مراجعة أفلام ومسلسلات ودايمًا من غير حرق، ولو كان في حرق، ساعتها محمد مهدي، مقدم المحتوى، هيقولك في عنوان الفيديو. وبيتعاون مع اليوتيوبر السعودي، ماهر موصلي، علشان يقدموا ترشيحات ومناقشات كل شهر لأهم الأفلام والمسلسلات من وجهة نظرهم.
القناة بتعرض مراجعات مميزة وفيها أفكار جديدة ووجهات نظر مختلفة، ومهدي شاطر جدًا في السينما وبيفهم في حاجات كتير، وبيشرّح الأعمال السينمائية والدرامية لأجزاءها الأساسية وبينقد كل جزء لوحده، وده هيساعدك تفهم أكتر عن العمل الفني لو كنت من عٌشاق السينما والدراما زيّنا.
أسئلة نص الليل
القناة بتسأل أسئلة من نوع الاسئلة اللي بتجيلنا فجأة، زيّ ليه بنحس بكهربا لما نلمس الحاجات أحيانًا، أو ليه بنحس إننا مرينا بالموقف ده قبل كده، أو ليه بنصحى في أهم جزء من الحلم، وأسئلة تانية كتير من نوعية الأسئلة اللي بتشغلنا أحيانًا وبنكسل ندور عليها.
وبتطرح القناة الفكرة بطريقة ممتعة ولذيذة، وبتاخد منهج علمي أو تاريخي، أو تحليل فلسفي للفكرة علشان تفسرها وتشرحها، وهتلاقي الكلام بسيط وسهل جدًا إنك تفهمه.
أنس بوخش
بيعمل لقاءات مع ناس من فئات مختلفة، وفنانين ومشاهير، ولقاءاته إنسانية وبيركز فيها على الجانب الإنساني في الشخصيات اللي بيستضيفها، وبيخليك تعرف عنهم حاجات بسيطة بس قريبة من القلب وهتحسسك بدفء الإنسانية الجميل ده.
أخضر
القناة بتعرض ملخصات سريعة لكتب كتير ومن فئات مختلفة، من السياسة لعلم النفس وإدارة الأعمال والتنمية البشرية. والطريقة اللي بتعرض بها ملخصات الكتب لذيذة جدًا وبتستخدم كارتون مسلي وجذاب وممتعK علشان توصلك الأفكار الرئيسية للكتاب بطريقة سلسلة وفعالة.
هتلاقي فيديوهات كتير جدًا على قناة أخضر عن مئات الكتب، وكل فيديو فيهم مش بيزيد عن 15 دقيقة، فتقدر تشوف فيديو واحد كل يوم، وبكده تكون استفدت بأفكار كتاب واحد كل يوم. يا بلاش! مش كده!
Nedal Reads
نضال بتقدم محتوى بسيط وسهل وممتع، ورغم إن معظم فيديوهاتها بتتكلم عن الكتب اللي قرأتها، إلا إن جزء كبير أوي من المحتوى اللي بتعمله بتشارك فيه المتابعين بتوعها تجاربها مع التعليم والفن واستكشاف حاجات مختلفة، من دراما جديدة لفئات مختلفة من السينما والفنون.
الإسبتالية
بتقدم إيمان الإمام محتوى طبي مُبسط، وكل فيديو عندها بيشرح مرض معين أو حاجة طبية وتاريخها، وبتشرح المعلومات بطريقة بسيطة وسهلة، والفيديو دمه خفيف وممتع، وبيجذبك تكمل للأخر دايمًا.
الطريقة اللي إيمان بتقدم بها المعلومات الطبية بسيطة وسلسلة، لكنها دقيقة وبتستخدم ألفاظ علمية صحيحة، وده بيخلي المحتوى بتاعها مصدر ثقة للمعلومة.
ايجيكولوجي
محتوى لذيذ وهادي، تقدروا تتفرجوا عليه وأنتوا فاضيين كده وعايزين تفصلوا وفي نفس الوقت تستفادوا وتتعلموا حاجة جديدة. القناة بتتكلم في مواضيع مختلفة بتهم كل الناس، وأحمد سمير، اللي بيقدم المحتوى عنده كاريزما ولطيف جدًا، وبيعمل بحث قوي قبل ما يتكلم عن أي حاجة.
اللي بيميز القناة إنها عشوائية Random وبتقدم حاجات من كل حتة فمش هتزهق وأنت بتتفرج، ولما بينزلوا فيديو جديد هيفاجئوك وهيخلوك عايز تدخل تتفرج، وكمان الفيديوهات بتاعته قصيرة وسريعة ومناسبة أوي لو كنت مشغول وعايز تفصل شوية من الشغل أو الدراسة.
لو تعرف قنوات يوتيوب عربية تانية بتقدم محتوى جميل وممتع ويستحق إننا نتابعه، سيب لنا اليوزر بتاع القناة في الكومنتات وقول لنا بتحبها ليه، وإيه اللي يميز المحتوى بتاعها.