قبل الفاست فود ما يبقى في كل حتة وبناكله دايمًا، شبه يوميًا كمان، ومبي كان على القمة ومن أوائل اللي موجودين في مصر، كان فسحة بنستناها علشان ناكل برجر، أوقات كتير كمان كان بيبقى مكافئة لينا، إننا مش هناكل من أكل البيت، كان يعتبر أول سلسلة مطاعم برجر في مصر، في وقت كان المطاعم هنا هي مطاعم الكباب والكفتة، ماكانش وقتها منتشر فكرة المطاعم في كل حتة. علامة مميزة لجيل التمانينات والتسعينات.
ومبي أخيرًا راجع، حتى وسط كل مطاعم والأكلات الجديدة والتريندات اللي بتتسابق مين هيخترع أكل، ومبي له مكانة في قلبنا وفرحنا بخبر رجوعه ومستنيينه بفارغ الصبر، وفرحتنا مفيش زيّها لما لقينا فيديو انتشر على انستجرام لبيدج المطعم، اللي لسه معمولة قريب، فرحنا إننا هنقدر نستعيد ذكرياتنا وأيام طفولتنا اللي كانت فيه.
بهاشتاج #راجعين_علشانك، مستنيين رجوعه من تاني، بعد ما افتقدناه أكتر من 20 سنة، وافتقدنا معاه ذكريات كتير وأيام حلوة، مستنيين نرجع نحس بكل ده مرة تانية، ونحكي أكتر للأجيال اللي ماتعرفش إيه هو ومبي، نحاول نستعيد معاهم ذكرياتنا وحكاياتنا ونخليهم هما كمان يصنعوا ذكريات جديدة معاه.
بمناسبة ان ومبي راجع يشتغل في مصر.
نيللي و محمود عبدالعزيز في ومبي بياكلوا برجر ١٩٧٨ pic.twitter.com/DAbWBlwvtU— ayman zorkany (@zor2any) May 10, 2021