أكيد بنحزن على موت شخص عزيز، بس دايمًا الحزن بيختلف لو فراق شخص كان سبب في نشر سعادة وطاقة إيجابية لكل اللي حواليه، بعد صراع سنين مع مرض السرطان، اتوفى محمد القضاة الملقب بوزير السعادة في الأردن، وده اللقب اللي أطلقه عليه عدد من رواد السوشيال ميديا، لإنه كان طول الوقت بينشر الإيجابية من خلال رسايله للجمهور اللي بيبعتها للجمهور من صفحته الشخصية خلال رحلته مع المرض.
ناس كتير أتأثرت بوفاته وكتبت عن حزنها بفراقه في الأردن، وخصوصًا إنه كان أخر بوست ليه بيقول إن المرض انتشر في أربع أماكن في جسمه وبقى من الصعب السيطرة عليه. ومش بس كده ده في أخر فترة كان بيحارب فيروس كورونا مع السرطان وده اللي خلى في تعاطف أكبر معاه.
من فترة قريبة استقبل كل الشعب العربي خبر وفاة نجم الكوميديا سمير غانم، وبعدها بكام شهر وفاة النجمة دلال عبد العزيز، خبر وفاتهم ورا بعض في الفترة القصيرة دي ، كان صادم بالنسبة لينا كلنا، لإن الشخصيات دي كانت بالنسبة لينا مش مجرد فنانين بيأدوا أدوارهم في الأفلام والمسلسلات، لأ احنا كنا بنعتبرهم فعلًا “وزراء السعادة” في الفن.
العيلة كلها الحقيقة كانت بتنشر بهجة وحب وطاقة إيجابية لما بيظهروا مع بعض، ويمكن حادثة وفاة وزير السعادة محمد القضاة، هو اللي فكرنا من تاني بناس فقدناها في حياتنا وكانوا ماليين الدنيا علينا بهجة وأمل وسعادة.