ضد أي مخاطر محتملة ممكن يواجهها المصريين في سفرهم للخارج، مصر بتبذل جهودها لتقديم الرعاية لأبنائها المسافرين، بإصدار وثيقة تأمين على كل جواز سفر مصري، بتراعي أفضل الأساليب المتعارف عليها في إدارة الخطر العالمية والمرتبطة بتوفير حماية تأمينية لرعايا الدول بالخارج، إزاي نعمله وتكلفته قد إيه وإيه المزايا اللي بيقدمها؟ تعالوا نشوف كل اللي محتاجين تعرفوه.
المركز الإعلامي لمجلس الوزراء المصري أصدر تقرير بشأن وثيقة تأمين رعاية المسافر، واللي بتوفرها الدولة ضمن مجهوداتها لمد مظلة الحماية التأمينية لأبنائها في كل مكان في العالم، التقرير بيوضح إن وثيقة التأمين دي بيتم إصدارها لكل جواز سفر مصري، علشان تقدم خدمة تأمينية للمصريين ضد أي أخطار ممكن يتعرضولها خلال 90 يوم متتالية من سفرهم للخارج، وبتشارك فيها 22 شركة تأمين.
الوثيقة بتشمل مميزات، بتغطي جميع النفقات الطبية وتكاليف الإقامة في المستشفيات بحد أقصى 30 ألف يورو أو ما يعادلها، على أن يتحمل الشخص الـ100 يورو الأولى أو ما يعادلها، والمسافر هيتمتع بنفس التغطية عن كل رحلة لا تتجاوز الـ90 يوماً خلال مدة سريان جواز السفر.
هيتم تفعيل الوثيقة الأمنية لكل جوازات السفر الصادرة أو المجددة بعد 1/7/2021، وبشرط يكون عمر الفرد اللي طلب الوثيقة أكثر من شهر وأقل من 85 سنة، وبتفضل الوثيقة صالحة طول مدة سريان جواز السفر وبتتجدد عند تجديده، أما عن رسوم استخراج الوثيقة التأمينية، هتكون 300 جنيه قيمة قسط الوثيقة عند استخراج جواز سفر جديد أو عند تجديده.
التأمين بيشمل تغطية تكاليف النقل أو إعادة المؤمن عليه إلى محل الإقامة في حال المرض أو وقوع حادث، بالإضافة إلى تغطية تكاليف إعادة الجثمان إلى بلد الإقامة في حال وفاة الشخص المؤمن عليه خارج البلاد، ده غير تغطية الأمراض الطارئة، وعلاج فيروس كورونا. أما الحالات اللي مش بيتضمنها التأمين فهي الإصابات المزمنة ورعاية الحمل والولادة، وحالات السفر بنية العلاج، أو التعاطي الإرادي للكحول او المخدرات أو تناول الأدوية بدون روشتة طبية.