تقريبًا ده اكتر جهاز مظلوم معانا في البيت، دايمًا بنجرب فيه من غير ما نبقى متأكدين، بنسأل سؤال كليشيه قبل ما ندخل فيه حاجة مش عارفين بينفع تدخله ولا لأ، بس بنجرب فيه في كل الأحوال، وسط كل ده أكيد بنعمل غلطات بتدمر الميكروويف من غير ما نعرف، كمان لاقدر الله الغلطات دي ممكن تتسبب في كارثة وحريق، علشان كده تعالوا نعرف إيه الكوارث اللي بنعملها بتضر الميكروييف.
تسخين الأكل مكشوف
ممكن نبقى معظم الوقت بنكسل نغطي الأكل قبل ما ندخله يسخن في الميكروويف، لكن دي غلطة ممكن تتسبب في تدميره بسبب بقايا الأكل اللي بتتناثر في زواياه، كمان لازم نحافظ على الأكل متغطي داخل الميكروويف علشان نضمن تسخينه وتسويته بالتساوي,
إدخال المعالق والشوك
أيًا كانت ماتريال الشوك أو المعالق، معدن أو خشب أو بلاستيك، خطر جدًا ندخلهم الميكروويف، وممكن نكون بننساهم في الطبق نفسه وندخله، علشان كده لازم ناخد بالنا لإنهم بيسببوا نشوب الحريق مش بس إتلاف الجهاز.
وضع أشياء فوق سطح الميكروويف
أوقات كتير علشان نوفر مساحة في المطبخ، او بنسى واحنا مستعجلين، وبنحط حاجات فوق الميكروويف، لكن ده بيغطي فتحات التهوية اللي موجودة أعلى الجهاز وده تصرف غلط بيسبب خطر كبير عليه.
عدم تنضيفه بشكل مستمر
رغم إن طريقة تنضيفه سهلة، لكن عدم الاستمرار عليها بيسبب خطر على العمر الافتراضي للجهاز، وطريقة تنضيفه ببساطة: كوباية مياه نحطها ونسخنها في الميكروويف لمدة دقيقتين، وبعدين نفتح الباب شوي علشان بخار المياه يفتت الدهون وينضف الجهاز.
زيادة وزن الأكل على الميكروويف
زيادة أوزان الأكل بصورة كبيرة على طبق الميكروويف بيشكل خطر على ماتور طبق الميكروويف بيؤدى لتلفه بشكل سريع، والصح إننا نقسم الأكل الكبير على مرتين أو ثلاثة لتخفيف الاحمال.
استخدام أطباق غير آمنة للحرارة
وطبعًا الغلطة دي لو وقعنا فيها بتبقى علشان مش متأكدين بنسبة 100% هل الطبق أو العلبة اللي هندخلهم دول خامتهم آمنة للتعرض للحرارة ولا هتسبب حريق، ولو فيه خامات مش هتسبب حريق، فهي للأسف هتكون ضارة في الأكل بمجرد تعرضها للحرارة زي الورق والبلاستيك.