بعد الاستمتاع وشعور الشبع المؤقت اللي بيجيلنا بعد عرض ومشاهدة مسلسلات رمضان اللي بتجمع بين أبطالنا المفضلين والكبار، بنبدأ نحس باحتياجنا للتشبع من ناحية تانية، وهي الفرجة على أفلام تقيلة من بطولة نجوم كبار، وتكون القصة شيقة ومختلفة، تستحق إننا نروح السينمات مخصوص علشان نستمتع بيها على الشاشة الكبيرة وبمؤثرات الصوت اللي بيعززها مكبرات الصوت الموجودة في صالات السينما. علشان كده، نحب نقولكم إن في فيلم من النوع ده هتستنوا عرضه من دلوقتي، وهو فيلم كوزمو.
فيلم كوزمو من تأليف هشام هلال وإنتاج وليد منصور ومن إخراج حسين المنباوي اللي بدأ حاليًا في تحضيراته المبدأية من ناحية اختيار أبطال العمل وقراءة السيناريو والحوار. ومن المفترض إن العمل ده هيكون بطولة جماعية بيجمع بين 8 أبطال، ومن المرشحين حاليًا لأخذ أدوار البطولة هما أحمد عز وأمير كرارة ومنة شلبي، اللي هتدور أحداثهم في إطار الأكشن والتشويق. لإن القصة من المفترض إنها هتتناول قصة بطل بيكتشف أسباب قتل والده وبيسعى طول المسلسل للانتقام.
لحد دلوقتي مفيش معلومات مؤكدة إن الأبطال المرشحين تعاقدوا على العمل، ولكننا شوفنا قبل كده المؤلف هشام هلال والمنتج وليد منصور والممثل أمير كرارة مجتمعين في فيلم كازابلانكا اللي حقق نجاح كبير، علشان كده ولحد ما نتأكد من توثيق عقود الأبطال المرشحين للعمل، هنفضل متفائلين وعندنا أمل إننا نشوف النجوم الكبار دول مجتمعين في شاشة واحدة!