عارف إن في أكتر من هرمون للسعادة؟ في ناس ممكن تكون ماتعرفش إن في مجموعة من المواد الكيميائية في الجسم مسؤولة عن حالتك المزاجية، وهي هرمونات السعادة، والناس في الأغلب بتحطها تحت اسم هرمون “السيروتونين”، بس في الحقيقة في مجموعة كاملة من الهرمونات مش نوع واحد بس مسؤولة عن تحسين المزاج.
إيه أنواع هرمونات السعادة وازاي نزودها في جسمنا؟
في أكتر من نوع لهرمونات السعادة، كل نوع من الأنواع دي مرتبط بأوقات معينة أو حاجة معنوية حصلت لك وبيتفرز في المخ لما بتتحقق.
السيروتونين
هرمون مرتبط في الأساس بالشعور بالثقة بالنفس والانتماء، فإفرازه بيعزز الإحساسين دول، ده غير إنه يعتبر من مضادات الاكتئاب، وبيساعد في علاج اضطرابات الوسواس القهري، وممكن نزوده بحاجات بسيطة زيّ إننا نسترجع ذكريات سعيدة ممكن تبسطنا، وإنك تزود من الفيتامينات اللي ممكن نقصها يجيب اكتئاب، زيّ فيتامين (B12).
الدوبامين
مركب مسؤول عن شعور المكافأة، بيتفرز لما بننجز عمل معين، فبنحس بالرضا، وده يعتبر نوع من أنواع المتع أو اللذات، والهرمون ده بيسموه “هرمون النجاح والتحفيز”.
الأوكسيتوسين
هرمون بيتفرز من الفص الخلفي للغدة النخامية، وبيسموه هرمون الحب أو العناق، لإنه بيُطلق في الدم وبيزيد في الوقت اللي بتعبر فيه عن مشاعرك.
الأدرينالين
هرمون من ضمن هرمونات السعادة والطاقة في نفس الوقت، علشان بيعمل على زيادة معدل ضربات القلب، وتنظيم ضغط الدم وتدفقه بالشكل اللي يدي لك إحساس بالطاقة والسعادة.
الجريلين
هرمون مسؤول عن مشاعر الهدوء والراحة والاسترخاء، والاستقرار النفسي، وبيتفرز في حالات التوتر علشان يساعد الجسم إنه يسترخي، وبالتالي ممكن يحس بالجوع، وده اللي بيفسر ليه أحيانًا الناس بتاكل كتير في أوقات التوتر.
ازاى نقدر نزود من نسبة هرمونات السعادة في جسمنا؟
ممكن بطرق بسيطة نزود من نسب الهرمونات دي في جسمنا، من غير ما نلجأ لأدوية علشان تساعدنا في ده وأكد عليها موقع (هيلث لاين).
الضحك
زيّ ما معروف عنه إنه بيطول العمر، كمان ممكن يساعد في تعزيز إفرازات واحد من أهم هرمونات السعادة. فاضحك حتى لو على حاجات بسيطة، فيديو أو فيلم ممكن يساعدك ببساطة.
التعرض للشمس
لإن الشمس بتمدنا بفيتامين د، ونقصه ممكن يجيب اكتئاب، وهو برضه من الفيتامينات اللي بتساعد على إنتاج المواد الكميائية في المخ، ومنها الدوبامين.
التأمل
بيساعد على تحفيز الغدة النخامية، وبالتالي تحفيز هرمون الأندروفين، وكل اللي عليك هو إنك تتأمل 10 دقائق بس مع تمارين التنفس.
الرقص
حاليًا بيُستخدم الرقص ضمن جلسات العلاج النفسي، وخصوصًا في أمريكا، لإن عندهم حركة شعبية اسمها “حركة الرقص في المجتمع الطبي”، بيستخدموه الناس كنوع من أنواع التحرر من القيود والضغوط والهموم، ولإن حركة الجسم بشكل عام بتحسن من الحالة المزاجية، ده غير إن الرقص في حد ذاته قادر إنه يعزز الثقة في النفس، والبعد عن أي بوادر للاكتئاب.
غير الأنشطة دي، في أنشطة كتيرة وبسيطة تقدر تعملها، وتساعدك إنك تفرز واحد من الهرمونات دي، ومن ضمنها برضه، إنك تمارس الرياضة حتى لو هتمشي أو هتجري، وأكل الشوكولاتة لإنها بتساعد على تحفيز هرمون السيروتونين، فبتحس بعدها بالراحة والاسترخاء الذهني، ودي حاجات شائعة جدًا ومعروف تأثيرها على الحالة المزاجية.
آخر كلمة: ماتفوتوش قراءة: الرقص من فن لرياضة، تعالوا نشوف طريقة التعبير عن النفس دي اتطورت إزاي