إيهاب توفيق واحد من أشهر مطربين فترة التسعينيات ولحد دلوقتي، بصوته الجذاب وإحساسه اللي خلاه نجم من نجوم الغناء في الوطن العربي، على مدار مشواره الفني، له رصيد من الأغاني النوستاليجا اللي معلقة معانا وبنسمعها في أوقات مختلفة، وكانت علامة فارقة في تاريخه وساهمت بشكل كبير في خلق شعبيته، ومناسبة لكل مود.
في عيد ميلاده، جمعنالك أشهرهم، وهنقولك تسمعهم في أي مود وامتى وأنت بتعمل إيه، علشان تدخل في أجواء الأغنية صح وتعيش معاها.
قسم المجروحين
إيهاب توفيق عنده كوكتيل من الأغاني الحزينة، اللي تقدر بسهولة تخليك تقطع شرايينك بعدها، لإنه بيعيشك في جو الأحزان من غير ما تكون حزين أصلًا، يعني عندك أغنية “تترجى فيا” اللي بتقول” تترجى فيا تبكي عليا مش ممكن يوم حأقدر أسامح مش هنسى يوم إن أنت جارح” قدمها من 20 سنة ضمن ألبوم “حبيب القلب” ولسه الجمهور بيسترجعها حتى على أغاني التيك توك.
أغنية “مالهمش في الطيب” أغنية كده مليانة بالشجن والعتاب، ولا أغنية “عدى الليل” اللي بيقول فيها “وعدى الليل على مهله.. وقلبي يا عيني بيندهله ندهلك قال ومستني”، ولا أغنية “سامحني خلاص” اللي بتقول “سامحني خلاص سامحني يا ريت أنا غلطان وتهت وجيت” يعني حاجة في منتهى جلد الذات.
نوعية الأغاني دي محتاجة تتسمع في البيت بالليل وتبقى لوحدك، وتفتكر كل ذكرياتك مع الفركشة والإكسات اللي سبتهم وسابوك، وتجهز معاك علبة مناديل تحسبًا لأي مشاعر فياضة لأصحاب القلوب الرهيفة.
تترجى فيا
مالهمش في الطيب
عدى الليل
سامحني خلاص
قسم الحبيبة
خلاص خلصنا عياط وشحتفة؟ نيجي بقى لأشهر أغانيه الرومانسية، كان بيقدمها بصوت دافي زيّ “حبك علمني” بيتكلم فيها عن ازاي الشخص غير حياته لدرجة لو خلص الحب هيرجع يحبه تاني، وبيقول “وأنا بعد اللي أنا حسيته معاك مابيكفيش العشق ساعات، ولو خلصت الحب معاكي هيرجع قلبي يحبك تاني”، ولا أغنية “سحراني” اللي كان بيتغزل فيها في محبوبته “سحراني ليل ونهار.. آه من الهوى ومنها.. قايد في قلبي النار وعيوني عاشقينها.. الحلوة يابا مجنناني”، أغاني هتملى عيونك قلوب بسبب ومن غير سبب، سواء كنت بتحب أو لأ، فننصحك لو عايز تسمعها تبقى لوحدك برضه، علشان الابتسامة البلهاء اللي هتترسم على وشك بدون سبب وأنت بتسمعهم، وعلشان برضه الحاجة ماتجيش تقولك “هو فيه إيه”.
حبك علمني
سحراني
مراسيل
قسم الفرفشة والأفراح وليالي الملاح
دي بقى مجموعة من الأغاني مناسبة جدًا لأصحاب الفرفشة والانبساط، تسمعها في الأفراح وأعياد الميلاد أو وأنت متجمع مع الأصحاب، وأنت في العربية على الطريق وكلك حماس وطاقة إيجابية على الصبح، لإن إيقاعها سريع وبتخليك عايز ترقص، زيّ أغنية “الله عليك يا سيدي” واللي بتعتبر من الأغاني اللي كونت قاعدة جماهيرية كبيرة لإيهاب توفيق، وأغنية “دانـي” أول أغنية عملها وحققت نجاح غير متوقع، وبعدها انضم لشركة منتجة وعمل أول ألبومه له “اكمني”.
الله عليك يا سيدي
داني بالفرح
عامل عاملة
رسمتك
الحلو حلو
اللي مش معروف أوي عن إيهاب توفيق، إن الفنان والموسيقار محمد عبد الوهاب هو اللي اختار له اسم شهرته، وقت لما كان بيترأس لجنة تحكيم مسابقة مجلة “أكتوبر” للمواهب الشابة، وفاز إيهاب توفيق فيها بالمركز الأول، وكان وقتها أول ظهور له في 1988.