مسلسل الطاووس والضجة اللي عملها من وقت الإعلان عنه من قبل رمضان، والخلاف والجدل عن إنه بيناقش قضية الفيرمونت ولا بيناقش قضية الاغتصاب بشكل عام، وهل لو المقصود بيه الفيرمونت، فهل ده ضد قرارات بعدم النشر في القضية طالما هي في مرحلة التحقيق لسه! مواقف كتير تجاه المسلسل، أبرزهم موقف الفنانة نهى العمروسي اللي كانت ضد الدعايا اللي بتتعمل للمسلسل باستخدام صورة نازلي بنتها، الشاهدة في قضية الفيرمونت، لكن بعد عرض المسلسل، حاجات كتير اختلفت.
المسلسل اتعرض في السباق الرمضاني من بدايته، والناس تابعته وشافت إنه بيناقش قضية مهمة بتهدد المجتمع، لكن من يومين، صدر قرار من المجلس الأعلى لتنظيم الإعلام في مصر بالتحقيق مع صناع مسلسل الطاووس، اختلفت آراء المشاهدين والفنانين كمان، بين داعم للمسلسل وشايفه إنه بيناقش القضية بشكل مهني من غير ألفاظ أو أي حاجة خارجة، وفي اللي التزموا الصمت، وفي اللي شافوا إنه صح لحد ما يتم الانتهاء من تحقيقات قضية الفيرمونت لإنهم شايفين إنه هي نفس قصة القضية باختلاف الأسماء.
لكن الفنانة نهى العمروسي بعد قرار التحقيق، صرحت بإنها مش ضد عرض المسلسل، وإن منعًا للخلط، أكدت إنها مالهاش أي علاقة بمحاولات وقف المسلسل، وإنها كان اعتراضها في البداية على الدعاية اللي استخدمت صورة بنتها نازلي على بوسترات دعاية للمسلسل على بعض صفحات السوشيال ميديا، لكنها مع حرية الإبداع وبتحترم مهنتها وزملائها ومجهودهم، وأكدت إنها بتدعم مسلسل الطاووس.
والمحامي طارق العوضي كان قدم بلاغ للنائب العام بيطالب فيه بوقف المسلسل لكن بسبب استخدام صورة موكلته نازلي وقضية الفيرمونت كدعاية، خصوصًا إن النيابة كانت حذرت من تناول القضية لإنها مازالت في مرحلة التحقيقات.