في فعاليات الدورة الرابعة لمهرجان الجونة السنادي، الفنانين تألقوا بإطلالات كتيرة مختلفة على أحدث موضة، لكن في العادي اتعودنا نشوف على السجادة الحمراء في المهرجانات السينمائية بِدل رسمية بشكل تقليدي، بس السنادي شوفنا إطلالات مختلفة لنجومنا الشباب كسرت القاعدة.. تعالوا نشوف مين منهم اختار إطلالة مختلفة.
أحمد مالك
مالك من أكتر الفنانين اللي بيحبوا دايمًا يخرجوا عن المألوف خصوصًا في الموضة، وبنشوف منه كل جديد ومختلف في كل مرة بيظهر في مهرجانات سواء في مصر أو في العالم، والسنادي في مهرجان الجونة ظهر في حفل الافتتاح ببدلة كاجوال واختار يلبس تحتها تيشيرت أبيض، وفي فعاليات المهرجان ظهر بإطلالة تانية كاجوال اعتمد فيها على تيشيرت أسود.
أحمد السقا
السقا في تاني أيام مهرجان الجونة، ظهر بإطلالة مختلفة على السجادة الحمراء يمكن أول مرة نشوفه بيها في مهرجان بشكل رسمي، لكنها كانت مختلفة، ولايقة عليه.
نيقولا معوض
نيقولا ظهر بقميص كاجوال على السجادة الحمراء، واختار اللون الأسود لإطلالة جذابة وكاجوال مش معتادة على السجادة الحمراء، كملها كمان الاكسسوارات اللي اختارها علشان تكون لايقة على الإطلالة كلها بشكل عام.
جمال سليمان
عن: جريدة البلاد ![]()
عن: انستجرام
النجم السوري جمال سليمان ظهر في مهرجان الجونة بإطلالة شبابية، اعتمد فيها على قميص أسود وتحته تيشيرت أبيض، بشكل غير معتاد عليه في المهرجانات لكنها إطلالة مختلفة وهادية.
أمجد أبو العلا
عن: انستجرام ![]()
المخرج السوداني أمجد أبو العلا ظهر على السجادة الحمراء لمهرجان الجونة بإطلالة بسيطة وهادية لفتت الأنظار بعيدًا عن الإطلالات الرسمية اللي اتعودنا عليها.
محمد مكاوي
الممثل والإنفلونسر محمد مكاوي على السجادة الحمراء لمهرجان الجونة بإطلالات مختلفة بعيدة عن اللبس الرسمي، بستايل مختلف حتى في لون شعره.
أمير المصري
الفنان الصاعد أمير المصري اللي اتعرف من دوره في فيلم رمضان مبروك أبو العلمين حمودة مع النجم محمد هنيدي، ظهر في المهرجان بقميص منقوش وجاكيت كاجوال في إطلالة مختلفة مش متعودين نشوفها على السجادة الحمراء.