السوشيال ميديا بقت دلوقتي عبارة عن إما أخبار فيروس الكورونا أو بوستات الملل والزهق، وده لإن فعلاً القعدة في البيت طول اليوم ممكن تكون محبطة، بس اللي إنت مش واخد بالك منه هو إن الوقت ده ممكن يكون أنسب فترة تقدر تستمتع فيها بكتبك المفضلة. أنت مش هيكون بس عندك وقت تقرأ أكتر، أنت كمان ممكن تنضم لنادي كتاب وتتواصل مع ناس عندها نفس اهتماماتك.
نوادي الكتب والقراءة بقت بتتجه دلوقتي للأنترنت، وواحد من أكبر النوادي دي في مصر هو رُكن الياسمين إللي أطلق مؤخراً مارثون للقراءة. المراثون ده معمول علشان أعضاء النادي يمارسوا أنشطة مختلفة وقت العزل ومنها إنهم بيقترحوا كتاب جديد كل يوم، وبيقرأوا سوى، وبيناقشوا كتب، وبيتفاعلوا مع بعض. أي حد يقدر ينضم للنادي، ومشاركتك في جروب زي ده أكيد هتساعدك في إختيار الكتاب المنسب ليك، ولوعندك قائمة نفسك تخلصها من زمان هتشجعك تخلص كل الكتب اللي فيها.
ولو أنت بتواجه صعوبة في إنك تلاقي كتب خلال فترة العزل المنزلي، متقلقش علشان في طرق كتيرة تقدر تقرأ بيها. فتوصيل الكتب للبيت مثلا بقى مُتاح دلوقتي في أي حتة في مصر، وكمان الدار المصرية اللبنانية للنشر والتوزيع بقت بتوفر التوصيل للبيت مجاناً لو أشتريت كتب سعرها 150 جنيه أو أكتر.
وفي كمان آلاف الكتب والمكتبات الصوتية المُتاحة أونلاين ببلاش، زي أبليكيشن وموقع إقرأ لي اللي بيسمحلك تسمع مئات الكتب والروايات الصوتية. ومؤخراً أعلنت وزارة الثقافة المصرية تحميل وإتاحة كل إصدارات الهيئة المصرية العامة للكتاب على موقعها الرسمي للتحميل المجاني.
والأطفال بردو يقدروا يستفادوا من خدمات القراْة المجانية الجديدة، زي موقع توتا توتا لكتب الأطفال اللي بيوفرلهم حالياً أنشطة مجانية مع القصص بتاعتهم، وكل ده عشان يزودوا الإستفادة ومتعة القراءة عند الأطفال.
الكتب بيكون دورها في الغالب إنها تنمي عقلك وتقلل من التوتر والضغط العصبي اللي ممكن تكون بتمر فيه في فترة زي فترة العزل والحجر الصحي، هي تقدر بردو تساعدك تحسن من صحتك وتفتح عقلك على عوالم جديدة، وعلشان كده حاول دايماً إنك تختار الكتب المفيدة اللي بتديك تفاؤل بالحياة علشان تقدر تحافظ على الأمل في مستقبل أفضل.