رمضان خلاص على الأبواب وكل الناس متحمسة من أول إعلانات مسلسلات رمضان اللي بقت مالية كل الشوارع لحد البروموهات اللي بتنزل.. ومن الحاجات اللي بدأ يتعلن عنها قبل عرض الأعمال، هو المغنيين والمغنيات اللي هيشاركوا بصوتهم ويقدموا تترات المسلسلات. فتعالوا نشوف مع بعض مين من الأسماء الكبيرة في عالم الغناء هيمتعونا بصوتهم في تترات مسلسلات رمضان اللي جاي..
محمد منير – الاختيار 2
مسلسل الاختيار 2 اللي عنده كل عناصر النجاح والكل مستنيه بفارغ الصبر، بقى عنده عنصر قوي يخلي العمل متكامل بكل المقاييس، علشان الكينج محمد منير بالفعل انتهى من تسجيل تتر المسلسل.
تامر حسني – نسل الأغراب
مسلسل نسل الأغراب بطولة أحمد السقا وأمير كرارة كان من المفترض إن أنغام هي اللي هتغني التتر والرباعيات بتاعته، وبالفعل عملتهم ولكن حصل خلاف مع المخرج محمد سامي اللي بعد كده نشر صورة مع تامر حسني وأحمد السقا وعلق عليها بكلام حلو عن تامر حسني وإن هو اللي هيقوم بغناء تتر ورباعيات المسلسل.
شيرين عبد الوهاب – لحم غزال
صرحت غادة عبد الرازق من حسابها على انستجرام إن شيرين عبد الوهاب هتقوم بغناء تتر مسلسلها الرمضاني لحم غزال، وبعدها نفت شيرين الموضوع وقالت إن لسه ماتمش الاتفاق على حاجة زيّ دي، ولكن في النهاية اتدخل ملحن الأغنية وقال عبر تويتة إن تم انتهاء تسجيل الأغنية بصوت شيرين.. ونتمنى إن الثلاثي ده (الملحن وشيرين وغادة عبد الرازق) يحققوا النجاح مرة تانية لإن ده يعتبر التعاون التاني بينهم بعد أغنية “مشاعر”.
كارول سماحة – ضد الكسر
انتهت المطربة اللبنانية كارول سماحة من تسجيل أغنية “اللي خان” واللي هيكون تتر مسلسل ضد الكسر من بطولة نيللي كريم ومحمد فراج.
أصالة – قصر النيل/حرب أهلية/ بنت السلطان
نقدر نقول بكل ثقة إن أصالة مكتسحة في السباق الرمضاني لإنها هتقدم تترات 3 مسلسلات من المشاركين في رمضان، ومش أي مسلسلات كمان، دي أعمال كبيرة متوقع إنهم يحققوا نسب مشاهدة عالية وقت عرضهم. فهتقدم تتر مسلسل حرب أهلية بطولة يسرا وباسل الخياط، ومسلسل قصر النيل لدينا الشربيني، وكمان مسلسل بنت السلطان لروجينا.
رامي جمال – بين السما والأرض
هيغني تتر مسلسل بين السما والأرض اللي بطولته بتجمع بين نجوم كبار زيّ هاني سلامة ودُرة وغيرهم كتير، وكأول تجربة لرامي في غناء تتر عمل درامي، نقدر نأكد إنها بداية قوية!
حمادة هلال – المداح
مسلسل من بطولة حمادة هلال، ماينفعش نتوقع إننا نسمع صوت أي حد تاني في تتر المسلسل غير صوته هو.. مش كده ولا إيه؟