العاصمة الإدارية الجديدة قربت تكون جاهزة، وهي من أجدد المشاريع الاستثمارية العقارية في مصر، وحاجة كبيرة جدًا كلنا مستنيينها علشان نشوف شكلها هيكون عامل إزاي، وهتوفر إيه، وهو مشروع من جهود الدولة برئاسة عبد الفتاح السيسي رئيس الجمهورية علشان تقدم أحلى الخدمات للمواطنين والشعب، واللي متأكدين منه إن العاصمة الإدارية الجديدة هتقدم أجمل المشاريع، فتعالوا نشوف إيه اللي موجود جوا العاصمة الجديدة، من مولات ومجمع وزارات، وجامع، وكنيسة، وغيرها.
هنلاقي جوا العاصمة الجديدة حديقة مركزية كبيرة بيسموها “كابيتال بارك”، ونهر أخضر بطول 35 كم، ومطار دولي، وكمان هيكون في مركز للمؤتمرات، ومدينة طبية، ومدينة رياضية، ومدينة للمعارض، ومدينة الفنون والثقافة اللي هيكون جواها دار أوبرا، ومسرح للموسيقى، ومتحف خاص بالفنون المصرية، ومتحف شمع بتماثيل لشخصيات مصرية كبيرة، ومراسم للنحت وفنون الجرافيك، ومسرح مفتوح، ومركز للإبداع الفنى مخصص لخدمة الشباب المبدعين.
مشاريع العاصمة الإدارية الجديدة لسه مكملة وفي مسجد الفتاح العليم واللي فيه 21 قبة، وجامعة أجنبية وهي الفرع الدولي لجامعة جزيرة الأمير إدوارد الكندية واللي هيكون فيها ملاعب لكرة القدم وكرة السلة والتنس على الطراز الأوروبي على مساحة 30 فدان، وفي كمان برج ويعتبر أعلى برج في أفريقيا بارتفاع 385 متر، وطبعًا الحاجة اللي كلنا بنحبها المراكز التجارية أو المولات اللي بنروح نتسوق فيها أو نعمل شوبينج ونقضي أحلى الأوقات، واللي أكيد هيتفتح فيها أحلى وأجمد وأشهر الماركات ومنهم مول باريس، ومول الشانزليزيه، ومول دورادو.
وكمان في فندق الماسة كابيتال اللي تم افتتاحه، وبيعتبر من أكبر وأفخم الفنادق على مستوى العالم، وهيجذب السياحة والاستثمارات لمصر، وبيضم منتجع سياحي بيحتوي على بحيرة، وقاعة مؤتمرات كبيرة.
