مهرجان دبي للتسوق رجع من يوم 17 ديسمبر 2020 لحد يوم 31 يناير 2021، المهرجان اللي كله فرحة ومرح وسعادة، وبنقدر نستمتع بأجواء احتفالية استثنائية، وبيكون فيه تخفيضات للسلع وفعاليات ترفيهية، وأنشطة ومسابقات بجوائز، ويناسب خروجات كل الأفراد من العائلات والصحاب. وهو واحد من أطول وأبرز مهرجانات التجزئة على مستوى العالم.
المهرجان بيتعمل من 26 سنة، وبيشارك فيه أكبر الماركات العالمية، والسنة دي هنلاقي فعالية Salt Camp مقدمة من مطعم Find Salt في المهرجان، وهو واحد من أشهر مطاعم البرجر المحلية في المدينة، وعلشان تحجز مكانك زور الموقع ده. والمطعم بيقدم لحوم أبقار الواغيو اليابانية، والفراخ المقرمش، والبطاطس المحمرة، وكمان بيقدموا الحلويات زيّ كيكة الريد فيلفت، وكيكة الصنداي، وكوكيز، والشيكولاتة السخنة.
والمطعم مش بيقدم الأكل بس، ففي الفترة الصباحية بيكون في أنشطة وورش عمل عن الفن والتصوير الفوتوغرافي واللياقة البدنية، وكمان بيبيع أدوات التخييم علشان اللي بيحبوا البرية يقدروا يخيموا وهم بياكلوا أكل المطعم الشهي.
أما المهرجان هيستضيف مجموعة من نجوم موسيقى الروك العالميين ونجوم الغناء العربي والدي جي ومشاهير عالم الموسيقى لإحياء حفلات غنائي، ومن أبرز العروض ضمن إطار موسم الحفلات الموسيقية لمهرجان دبي للتسوق حفلة لمحمد حماقي، ومحمود العسيلي بكره في كوكاكولا أرينا، وكمان هيبقى في حفلة للنجم ناصيف زيتون ليلة رأس السنة في مركز دبي التجاري العالمي، وكمان في نفس اليوم هيقدم الدي جي سعيد مراد أهم أعماله، وكمان النجم والدي جي والمنتج العالمي ألان ووكر هيحيي حفل موسيقي يوم 7 يناير اللي جاي في كوكاكولا أرين، والنجم العالمي وأيقونة الموسيقى العربية الفنان عمرو دياب هيبقى ليه حفلة يوم 22 يناير 2021 في استاد دبي الدولي.