في شهر رمضان والأجواء المميزة بتاعته، اللي بتختلف عن باقي السنة وليها طابعها الخاص، في كل حاجة حوالينا، حتى اللبس، بنحب نلبس حاجات ليها علاقة بالأجواء الرمضانية، اللي معروفة في اللبس بالفساتين والعبايات والقفطان، والجديد بالكيمونو وكل الأزياء اللي في الاتجاه ده. بنحتار ننسقها ازاي أو نطلعها شكلها حلو في أوتفيت كامل، نلبسها على إيه، أو حتى نلبسها فين، خصوصًا بعد ما شوفنا موضة الناس انتقدتها، وهي لبس الكروب توب وعليه قفطان أو عباية مفتوحة، والناس قالت “في رمضان”؟ أيوة بالظبط زي ما سمعتها بصوت عمرو مصطفى وأنت بتقراها، فعلشان كده جبنا لكم ستايلات مختلفة للقفطان والكيمونو وكل الحاجات دي، من غير ما نتعب نفسنا في تنسيق الأوتفيت، وكمان من غير ما نخترع موضة مش لايقة. وكمان هنشوف الفنانين والنجوم اللي عملوا إطلالات مميزة وازاي نقدر نستوحى منها.
القفطان مابقاش دلوقتي موجود في دولة واحدة، معظم البلاد العربية بقت تعتمد على القفطان كقطعة أساسية ومهمة في الأزياء، وبنشوف به النجمات في مناسبات مختلفة، لكن أكيد هو مناسب جدًا لرمضان.
الفساتين بستايل واسع وخامات خفيفة وألوان فاتحة، موضة شايفينها بتكتسح العالم العربي حاليًا والبنات حابتها لإنها بتديهم لوك شيك وفي نفس الوقت من غير تفكير كتير في التنسيق، وكمان بيكون مريح وعملي للمشاوير والشغل وكمان الجامعة.وكمان ممكن الفساتين اللي بيكون ستايلها شبه العباية.
الكيمونو في الصيف بقى قطعة أساسية، بنقوشات مميزة بتبقى هي العامل الرئيسي للأوتفيت، مش بنحتاج نتعب في التنسيق لباقي القطع علشان مجرد ما نلبس معاه حاجات basic هنلاقي الطقم بقى جميل من غير مجهود.
سواء للسهر أو السحور، أو لعزومات الفطار، أو حتى في الشغل والمشاوير اليومية كمان ممكن نستخدم لهم كيمونو مريح بخامة خفيفة خصوصًا في الجو الحر اللي داخلين عليه، وكمان بألوان فاتحة مناسبة للصيف.
على جينز وتيشيرت أو فستان basic أو حتى جيبة، الكيمونو دايمًا هيكون له تاتش مميزة.