مدينة جرش بمحافظة جرش في الأردن، هي أكبر مدينة في المحافظة، موجودة في الجزء الشمالي الغربي من الأردن، وبتبعد 48 كم عن العاصمة عمان. بتتميز المدينة بالتنوع الجغرافي، من مرتفعات جبلية، لأودية خضراء، واتبنت جسور يونانية فوق نهر الذهب بتربط بين شرق، وغرب المدينة، ومعنى اسم جرش هو المكان المليان شجر كتير.
مدينة جرش هي من مدن الديكابوليس، وهو اتحاد 10 مدن رومانية من القرن الأول قبل الميلاد، وهي واحدة من المدن العربية القليلة اللي بتحتوي على معالم ومباني رومانية برا إيطاليا. والمدينة ليها طابع تاريخي مميز، فهي مزيج جميل من إرث حضاري يوناني وروماني، وحضارات الإسلام والشرق، لأنها مرت على حضارات كتيرة مختلفة، زي العصر الحجري الحديث من 7500 سنة قبل الميلاد، والعصر البرونزي المبكر من 3300 سنة قبل الميلاد، والعصر الحديدي من 1250 سنة قبل الميلاد، ومرحلة الغزو البابلي والغزو الفارسي من 550 سنة قبل الميلاد، والدولة النبطية من 150 سنة قبل الميلاد، والعصر الروماني، واليوناني، وازدهار الديانة المسيحية، وانفتاح الدولة الاسلامية، والعهد العثماني، وعهد الدولة الاردنية الهاشمية الحديثة.
كل سنة بيحصل في مدينة جرش احتفالات، ومهرجانات فنية، وثقافية، وموسيقية في شهر يوليو، وبتعتبر المدينة من أهم المدن السياحية في الأردن، لوجود معالم آثرية، وتاريخية فيها، فهي بتحتل المركز التاني للسياحة في الأردن بعد البتراء.
ومن ضمن المعالم الموجودة في جرش، قوس هادريان المعروف بقوس النصر، واللي اتبنى سنة 129 تكريمًا لزيارة الإمبراطور هادريان، وميدان سباق الخيول اللي موجود ورا قوس هادريان، ومعبد زيوس اللي اتبنى سنة 162، وشارع الأعمدة وهو الشارع الرئيسي في المدينة، ولسة مُحتفظ بأحجاره الأصلية، وسبيل الحوريات وهي مجموعة من نوافير المياه، الموجودة جوا مبنى اتبنى في نهاية القرن الثاني، ومزين بالنقوش الرخامية، والزخارف الهندسية الجميلة.