أكل كتير بيتبقي مننا واحنا بنطبخ، أو لما بنكون عاملين حسابنا في كميات معينة ونكتشف بعد كده إنها كانت أكتر من اللي محتاجينه، ومش بس وقت الطبخ، لكن في كمان أوقات كتيرة بنكون جايبين كميات كبيرة من العيش مثلًا ونكتشف إنها أكتر من الكميات اللي بنستعملها، ومنبقاش عارفين نعمل إيه ف البواقي، وعلشان كده هنعرف النهاردة طرق مختلفة نقدر نستخدم بيها بواقي الأكل من غير إهدار، ونعمل بيها وصفات تانية لذيذة.
العيش
أوقات كتير بتتراكم بواقي للعيش سواء البلدي أو الفينو، وعلشان منرميهوش، إحنا ممكن نعمل من العيش البلدي مقرمشات للتسالي بطريقتين، الأولي هي القلي في الزيت، والتانية هي التحميص في الفرن، وبعد كدة رشوا عليهم التوابل اللي بتحبوها، وأبدعوا في استخدام الصوصات.
أما بالنسبة للعيش الفينو فنقدر نستخدم البواقي منه كبقسماط ناعم للتتبيل، وده بطريقة سهلة جدًا هي إنكم تحطوه في الفرن يتحمص وبعد كدة هتطحنوه. ولو عندكم قطط أليفة، ممكن تقدمولهم وجبة بيه عن طريق تقطيعه قطع صغيرة وهتحطوه في لبن وتأكلوه للقطط.
الفواكه
كتير بيتبقى فواكه في البيت بكميات هتبوظ لو فضلت موجودة لمدة أطول، ومبنبقاش عارفين هنستخدمها إزاي. في كذا طريقة نقدر نستفيد بيها من الفواكه، ومنهم إننا نقطعهم ونعمل سلطة فواكه، ونضيف عليها أيس كريم أو أي إضافات بتحبوها، وممكن كمان نعملها سموزي بطريقة سهلة في الخلاط، بإننا نقطع الفواكه ونخلطها بتلج ولبن وسكر أو عسل في الخلاط، أو تخلطوها مع اللبن أو الزبادي وتقدموها في شكل ميلك تشيك.
الشوربة
أي شوربة بتتبقى من سلق اللحمة أو الفراخ ممكن تحتفظوا بيها في الفريزر وتستخدموها في أي وقت تاني علشان تعملوا منها شوربة زي شوربة اللسان عصفور أو شوربة الخضار، وكمان ممكن تستخدموها في تسوية المحشي أو الرز، أو أنواع تانية من الخضار زي الملوخية.
السمك
لو اتبقى سمك مقلي من وجبتكم، تقدروا تحتفظوا بيه وتشيلوا الجلد علشان تستخدموه في أي وقت تاني لعمل كفتة السمك. والكفتة بتتحضر بطريقة سهلة جدًا عن طريق هرس قطع السمك، وإضافة بقدونس وبقسماط ليها، وتشكليها على أي شكل كفتة بتحبوها، وبعد كدة بتبلوها بالبيض والبقسماط، وتقلوها في الزيت.
المكرونة
أوقات كتيرة بردو بيتبقى كمية كبيرة من المكرونة اللي تقدروا تحتفظوا بيها في التلاجة، وتعملوها في وصفة الكشري في أي يوم تاني، وكمان الطريقة دي هتنفع معاكم لو اتبقى صلصة زايدة عن استخدامكم.