برامج المواهب الغنائية من الأنواع اللي بييجي ليها نسب مشاهدة عالية جدًا، وده بيخلي صناع البرامج في الوطن العربي متحمسين إنهم يعملوا نسخ مُعربة من البرامج الأجنبية للمواهب. فشوفنا مواسم كتير لبرنامج “The Voice” اللي كان بيستضيف المواهب الشابة وكمان شوفنا بعدها “The Voice Kids” اللي كان بيستضيف الفئة العمرية الأصغر واللي وفرلهم الفرصة الذهبية إنهم يمشوا في طريق الشهرة من سن صغير.
بس بين The Voice و The Voice Kids، في فئة عمرية واحدة هي اللي إتنست ومأخدتش فرصة حقيقية تثبت نفسها، وهما كبار السن. الموهبة وتحقيق الأحلام مش بيقتصروا أو بينتهوا عند سن معين، وعلشان كده جيه برنامج “The Voice Senior” للنجدة وقدر يدي مواهب ما فوق الستين حقها.
عرضت قناة MBC بقناتها على اليوتيوب الإعلان التشويقي من البرنامج اللي من المقرر عرضه يوم الأربعاء الموافق 7 من أكتوبر الجاري. حكام البرنامج هيتكونوا من نخبة من نجوم العالم العربي في الغناء زي هاني شاكر، وسميرة سعيد، ونجوى كرم، وملحم زين، وهيتعرض الأربعاء من كل أسبوع على شاشة MBC1.
البرنامج المنتظر إتأجل مرتين، فكان من المقرر عرض البرنامج يوم 21 مارس، إلا إنه تم تأجيل العرض بسبب تداعيات فيروس كورونا، و تم التأجيل للمرة الثانية بسبب كارثة إنفجار المرفأ في بيروت. ولكنه أخيرًا تم الإعلان عن بدأ عرضه بشكل رسمي والكل مستني بفارغ الصبر إنه يستمتع بمشاهدة المواهب الكبيرة.