الحلقة الجديدة من Roam Egypt المرة دي من “مدينة السحر” زي ما بيتقال عليها، وفي الوقت ده من السنة والجو مناسب لجولة سياحية في الأقصر، بس هنشوفها بشكل مختلف؛ مدينة مصرية أصيلة فيها معالم حضارة مصر في مراحل مختلفة، وتعتبر من أشهر وأهم المدن السياحية في العالم كله، تعالوا نعرف الحلقة دي شافت الأقصر ازاي.
هوت إير بالون
علشان تعرف المعنى الحقيقي للجملة المشهورة “مصر من فوق حاجة تانية” لازم تعيش تجربة الهوت إير بالون في الأقصر، وتشوف المدينة كلها من فوق، معالم سياحية كتير، شكلها وأنت بتشوفها على بعد أكيد هيكون مختلف.
طريق الكباش
زي ما شوفناه في احتفالية كبيرة شهدها العالم كله، طريق الكباش اللي بيربط بين أهم معبدين في الأقصر؛ معبد الكرنك ومعبد الأقصر، وطوله 2700 متر. الطريق ده موجود من زمان لكن مر بفترات من الانهيار، ودلوقتي رجعت له الحياة مرة تانية وبقى من أهم معالم الأقصر.
معبد الكرنك
مش مجرد معبد تاريخي، ده مجموعة معابد، لإن كل ملك كان بيتوّج على عرش مصر كان لازم يبني حاجة في الكرنك ويهديها للإله “آمون رع”، وده خلّى معبد الكرنك شاهد تاريخي على عصور كتير مرت بها مصر بملوك مختلفين. المعبد كمان فيه حكاية لمثل شعبي بيتقال لحد دلوقتي وهو “أنت على راسك ريشة”، وعلى راسك ريشة دي جات من تمثال الإله “آمون رع”، اللي معروف بوجود بريشتين على راسه.
معبد الأقصر
معبد الأقصر كان المكان الرئيسي لواحد من أهم الاحتفالات الدينية المصرية القديمة؛ كان بيتم نقل تماثيل “آمون” وزوجته “موت” وابنهم “رب القمر خونسو” من معابدهم في الكرنك في موكب كبير لمعبد الأقصر علشان يتمكنوا من زيارة الرب المقيم هناك “آمون إم أوبت”، وهو الاحتفال المعروف باسم “عيد الأوبت”.
شارع السوق
هدايا أو تسوق، شارع السوق في الأقصر مكانك المثالي لو عايز تشتري أي حاجة، كل الحاجات المشهورة بها الأقصر؛ عطارة أو تمور أو لبس أو حتى تماثيل فرعونية وهدايا تكون ذكرى للرحلة المميزة والتجربة اللي هتعيشها في الأقصر.
معبد هابو
المعبد الجنائزي، أو معبد رمسيس التالت، أسماء مختلفة لمعبد هابو، اللي شيّده رمسيس التالت لإقامة الطقوس الجنائزية له، وبيتكون من مدخل عظيم بيحيط به برجين عليهم نقوش بتمثّل أذرع الأسرة وصور لرمسيس التالت، والطبقات العليا للبرجين دول كانت مُخصصة للحريم الملكي.
صنع الألباستر
في الأقصر، مش بس هتزور أماكن سياحية ومعابد، تقدر كمان تشوف أنشطة مختلفة بتنفرد بها الأقصر، زيّ صناعة الألباستر؛ التماثيل والأحجار الجميلة وكمان الشموع اللي بتتصنع بطريقة خاصة، لإنها مهنة ورثها المصريين من أيام الفراعنة، ولها قصص مختلفة تقدر تعرف عنها أكتر من هنا.
معبد حتشبسوت
من أشهر معابد الأقصر لواحدة من أشهر الملكات في تاريخ مصر، وبيتكون من 3 طبقات متدرجة، كل واحد فيهم عبارة عن صف من الأعمدة، وفي فناء مفتوح ورا الأعمدة وقدامهم تماثيل ل”حتشبسوت” بهيئة “أوزوريس”، المعبد كان بيُقام فيه الطقوس الجنائزية ل”حتشبسوت” وأبوها الملك “تحتمس الأول”.
وادي الملوك
وادي الملوك فيه 64 مقبرة لملوك مصر، واللي بيميزه إن ألوان الرسومات على الحيطان لسه محتفظة برونقها وجمالها والألوان زاهية كإنها لسه مرسومة قريب. ويعتبر أكبر مزار أثري مفتوح في العالم، والملوك اختاروا مكانه علشان يكون موقع راحتهم الأخير.
معبد ممنون
المعبد للأسف اتدمر في زلزال حصل في الأقصر، لكن التمثالين لسة موجودين وتم ترميمهم؛ التمثال اللي على اليمين للملك نفسه، والتمثال اللي على الشمال بيمثل الروح الملكية لنفس الملك. التمثالين تم نقلهم من القاهرة للأقصر تقريبًا في سنة 1300 قبل الميلاد.