بعد تأجيلات كتير تمت بالنسبة لامتحانات الترم الأول من العام الدراسي 2020-2021، بسبب انتشار فيروس كورونا ومحاولة الدولة في تقليل أعداد الإصابات، تمت الامتحانات في أواخر شهر فبراير ومستمرة لحد دلوقتي.. لكن بالنسبة للترم التاني فالموضوع كان مختلف، لإن ناس كتير بقى عندها تخوف إنها تروح المدرسة أو الجامعة لاستكمال الدراسة، ومن الزحمة اللي ممكن تحصل في المدرجات والفصول، وعلشان كده وزارة التربية والتعليم أتاحت 3 حلول علشان الأهالي والطلاب يختاروا الحل المناسب بالنسبة لهم.
أول خيار هو إن حضور طلاب المدارس هيكون اختياري مش إجباري ومش هيكون في حساب للغياب وده اللي هيسمح للطلاب إنهم يكملوا دراستهم من خلال التعليم عن بعد وعلى ولى الأمر إنه يبلغ المدرسة بأن الابن أو الابنه هيكملوا المنهج أونلاين.. وبالنسبة للطلاب اللي هتحضر، فمن أول صف KG1 ولحد تالتة ابتدائي، فهيكون الحضور 4 أيام، ومن رابعة ابتدائي لحد ستة ابتدائي هتتراوح الأيام بين حضور يومين أو تلاتة للدراسة، أما صفوف إعدادي وثانوي فهيكون يومين في الأسبوع.
وبخصوص الجامعات، فالحضور للكليات النظرية هيكون يومين والكليات العملية ما بين 3 – 4 أيام حسب طبيعة الكلية، وكل ده هيتم طبعًا مع تطبيق التعقيم المستمر والالتزام بالإجراءات الاحترازية.. وفي كمان خيار تالت وهو اختيار إعادة السنة الدراسية سواء لوجود ظروف صحية أو عدم رغبة الأهل أو الطالب إنه يروح مكان الدراسة أو يتعلم عن بعد، وده اللي بيدي مساحة للطالب إنه يكون عنده حرية الاختيار والتخفيف من التوتر.