في ظل الظروف الصعبة اللي بيمر بيها كتير من الناس حول العالم بسبب تداعيات فيرس كورونا اللي أكيد أثرت بالسلب على الاقتصاد وبالتالي كتير من الناس عانوا من أزمات مالية، أصدر الرئيس عبدالفتاح السيسي قرار يبشر كل المواطنين العاملين واللي هيساعدهم يتخطوا الأزمات المالية اللي بيمروا بيها حاليًا. فاجتمع الرئيس عبدالفتاح السيسي مع الدكتور مصطفى مدبولي رئيس مجلس الوزراء ووزير المالية بخصوص أجور العاملين. وقال السفير بسام راضي المتحدث الرسمي باسم رئاسة الجمهورية، إن الاجتماع كان بيناقش استعراض مشروع موازنة العام المالي القادم 2021-2022.
وتم اتخاذ قرار زيادة رواتب جميع العاملين بالجهاز الإداري للدولة بإجمالي نحو 37 مليار جنيه ورفع الحد الأدنى للأجور علشان يوصل لـ 2400 جنيه، ده بالإضافة لزيادة قيمة المعاشات بنحو 13% بتكلفة إجمالية حوالي 31 مليار جنيه. وإقرار علاوتين: الأولى علاوة دورية للموظفين المخاطبين بقانون الخدمة المدنية بنسبة 7% من الأجر الوظيفي، والثانية علاوة خاصة للعاملين غير المخاطبين بقانون الخدمة المدنية بنسبة 13% من المرتب الأساسي، واللي هيتكلف حوالي 7.5 مليار جنيه.
وكمان هيتم ترقية الموظفين المستوفين اشتراطات الترقية يوم 30 من شهر يونيو اللي جاي، وبالتالي هتزيد أجورهم بقيمة إجمالية تقدر بحوالي مليار جنيه. وهيتم تخصيص برنامج حافز مالي يقدر بنحو 1.5 مليار جنيه للعاملين المنقولين إلى العاصمة الإدارية الجديدة. ورفع الأجور ده هيساعد في استرداد الناس لنشاطها وهيكون حافز ليها إنها تجتهد أكبر في عمالها، لأنهم هيكونوا متأكدين إن المجهود ده متقدر.