تحت شعار “مصر بتتكلم حرفي”، أعلنت الدكتورة نيفين القباج وزيرة التضامن الاجتماعي عن إقامة معرض “ديارنا” للمعروضات اليدوية في دولة الإمارات وإيطاليا والسعودية وده قبل نهاية سنة 2021، واللي بيعتبر أهم وأقدم معرض للحرف التراثية في مصر، ومن المقرر إن أول معرض خارجي هيكون في السعودية.
وكان الهدف الأساسي من فكرة المعارض الخارجية هو التسويق الخارجي لكل المنتجات المصرية وإنها ماتبقاش بس على المستوى المحلي، أو إنك تروج بس لأماكن صناعتها في المحافظات.
من كم يوم تم افتتاح المعرض ده في مارينا 5 في منطقة العلمين الجديدة في الساحل الشمالي، واللي افتتحته وزيرة التضامن في حضور محافظ مطروح اللواء “خالد شعيب”، وكان في دورته الـ62 وكل فترة بيتم افتتاحه في مكان جديد، و كانت أخر مرة في كايرو فيستيفال سيتي في شهر فبراير.
المعرض اللي اتعمل في مارينا من كام يوم ده ضم 250 عارضًا أو كشك (booth) من 12 محافظة على 3 مراحل، وهتستمر كل مرحلة على مدار 10 أيام، وهيفضل لحد 24 أغسطس، وهيضم المنسوجات والمفروشات، والاكسسوارات المنزلية والكروشيه، والفضة والألباستر وغيرها من المنتجات المناسبة مع الصيف ومع احتياجات المصيفين في مارينا.
معرض ديارنا للحرف اليدوية والتراثية كان خلاصة جهود قامت بيها الوزارة علشان تدعم صغار المنتجين بالإضافة للترويج للمنتج الحرفي المصري، لإن التراث المصري على مختلف أنواعه بيدي إحساس بالفخر وعلامة ودليل على عراقة مصر وهويتها.