أول ميداليات مصر في أولمبياد طوكيو: هداية ملاك وسيف عيسى أبطال التايكوندو بالبرونزية

خبرين ورا بعض خلونا نفرح بأول انجازات بلدنا في الأولمبياد، أبطال مصر هداية ملاك وسيف عيسى افتتحوا طريق الفوز بالميداليات النهارده بتتويجهم بميداليتين برونزيتين في التايكوندو، هداية كسبت الأمريكية بايغ ماكفيرسون المصنفة خامسة عالميًا، بنتيجة 17-6، وبكده حققت أول ميدالية لمصر في أولمبياد طوكيو الصيفي، أما سيف عيسى فاز بالميدالية البرونزية لوزن 80 كجم، بعد فوزه على النرويجي ريتشارد أندري أورديمان 12-4.

هداية ملاك حققت ميداليات كتير في بطولات مختلفة سواء ذهبية أو فضية أو برونزية، كسبت الميدالية الذهبية في البطولة الإفريقية اللي أقيمت في بورسعيد في مايو 2016، في منافسات وزن تحت 57 كجم، بعد انسحاب بطلة المغرب من خوض المباراة النهائية، وفي أولمبياد ريو دي جانيرو حققت البرونزية، في وزن 57 كجم، والميدالية الفضية في بطولة الجائزة الكبرى النهائية 2016.

سيف عيسى من شهر حقق إنجاز بمشاركته في بطولة أفريقيا الأخيرة اللي أقيمت في السنغال بمشاركة حوالي 30 دولة أفريقية، كسب جائزة أفضل لاعب في البطولة، وكمان كسب الميدالية الذهبية في وزن 80 كجم بعد ما قدر يتغلب على بطل المغرب في المباراة النهائية، وده قبل مشاركته في أولمبياد طوكيو.

وبكده لحد دلوقتي الدول العربية حققت أربع ميداليات في الأولمبياد، من نصيب مصر وتونس، بعد تحقيق السباح التونسي أحمد الحفناوي الميدالية الذهبية في سباق نهائي الـ 400 متر سباحة حرة، وبكده يعتبر الحفناوي أول من منح العرب ميدالية ذهبية في الأولمبياد، ومحمد خليل الجندوبي اللي تم تتويجه بالميدالية الفضية في التايكوندو وزن 58 كجم، مستنيين أكتر من أبطالنا اللي بيمثلوا الدول العربية.

آخر كلمة: ماتفوتوش قراءة: العرب في أولمبياد طوكيو: أول ميداليتين من نصيب تونس في السباحة والتايكوندو

تعليقات
Loading...