اعتقد كلنا بلا استثناء حبيناها، بكل أدوارها من بدايتها وهي دلوعة، وعشقنا أدوارها وهي أم سواء الكوميدية أو الحكيمة اللي بتنصح في مشاهد لسه في دماغنا لحد دلوقتي، رجاء الجداوي فنانة مالهاش مثيل ووجودها في أي عمل فني بيفرق وبيضيف كتير للعمل، ورغم إنها فارقتنا في شهر يوليو اللي فات متأثرة بإصابتها بفيروس كورونا، إلا إنها لسه لحد دلوقتي كل كام شهر بتظهرلنا أعمال كانت صورتها قبل وفاتها، عشان تكون سمراء النيل أول فنانة تقدم العدد ده من العروض الأولى رغم وفاتها، الأعمال الفنية دي منهم اللي هيتعرض بكره 19 مارس على منصة شاهد، وهو فيلم أعز الولد، بطولة ميرفت أمين ودلال عبدالعزيز وشيرين وأمينة خليل وعمرو يوسف، ونجوم كتير بنحبهم، وكشفت المخرجة إن ده آخر عمل فني قامت بيه رجاء الجداوي قبل وفاتها.
العمل الفني التاني اللي شاركت فيه واتعرض بعد وفاتها فيلم توأم روحي، بطولة حسن الرداد وأمينة خليل وعائشة بن أحمد، واتعرض في شهر أغسطس اللي فات، بعد وفاة رجاء الجداوي بحوالي شهر.
وشاركت في مسلسل جمجوم وبم بم، اللي اتعرض بعد وفاتها على طول في نفس الشهر، وظهرت فيه بشخصيتها الحقيقية.
رجاء الجداوي مش أول فنانة يتعرضلها أعمال فنية بعد وفاتها، فنانين بنحبهم اتكرر معاهم الموضوع ده، زيّ وائل نور اللي توفى قبل عرض مسلسله شقة فيصل بكذا سنة، وكمان إبراهيم نصر، اللي توفى قبل عرض آخر فيلم شارك فيه وهو فيلم صاحب المقام، وغيرهم من الفنانين اللي بنحبهم وبنحب طلتهم علينا في أعمال فنية تفضل في ذاكرتنا، لإنهم كمان في اختيارهم لأعمالهم بيختاروا فن يعيش.