دايمًا لما بنشوف مواقف غريبة بتحصل بنقول إن دي أغرب حاجة شوفناها وسمعنا عنها، بس بيطلع لأ في أغرب وأعجب، وإننا ياما هنقابل ونشوف ونسمع حتى لو المواقف دي ممكن تتكرر مرة واحدة. وفي مواقف الانفصال دايمًا بنسمع عن أسباب غريبة وطرق أغرب بيتم بها الانفصال وتبان للوهلة الأولى مش منطقية وبتبقى مفاجأة، ونسأل هو ليه الشخص ممكن ينهي العلاقة كده؟
وفي واقعة غريبة ومثيرة بتأكد الكلام، دمياط شهدت واحدة من أغرب حالات الطلاق، شخص مصري طلق زوجته في حفل زفاف بنته في قاعة الفرح وقدام كل المدعوين، مسك الميكروفون، وكل الناس افتكرت إنه مسكه علشان يقول “ألف مبروك للعروسين” ويبارك لبنته، وطبيعي إن دي أول حاجة تيجي في دماغهم، بس اللي حصل كان عكس المتوقع.
والد العروسة مسك المايك وفي نص القاعة قال كده بالنص: “ألف ألف مبروك للعريس والعروسة، أما بالنسبة لأم العروسة فهي طالق بالتلاتة وتروح من القاعة على بيت أهلها، وألف مبروك”.
الناس كلها جالها صدمة بعد اللي حصل، حتى لما الفيديو اللي قال فيه الكلمتين دول انتشر على مواقع التواصل الاجتماعي في ناس استنكروا الموقف، وقالوا إنه كده كسر خاطرها في ليلة عمر بنتها، وإن ده مش من شيم الرجال، وإنه استغل وجود العيلة وإنها مش بتحب المشاكل ولا الفضائح، وإنه مايستحقش لقب أب ولا لقب راجل، وفي ناس تانية كان تعليقها “ما أكيد عملت مصيبة، الراجل برضه له طاقة” وإن في سبب قوي وأكيد مش هيعمل كده من الفراغ، وإنه أكيد اتعرض لحاجة كبيرة وماينفعش نحكم على الموضوع وناخد الأمور بالظاهر.
أما عن الأسباب اللي دفعته، في ناس رجحت إن ممكن يكون حصل خلافات بينهم لها علاقة بجواز بنتهم، والراجل ماستناش لما الفرح يخلص ولا استنى إنه يرجع البيت علشان يحلها.
لكن الزوجة طلعت وقالت إن اللي حصل ده فضيحة لها ولابنتها العروسة، وإنها ماكانتش متوقعة ده في ليلة عمر بنتها، وقالت إنها بتعاني من سنين مع جوزهها وسبق وانفصلت عنه رسميًا في يوليو اللي فات، بس فضلت إنها تفضل في منزل الزوجية لرعاية أبنائها، بس طليقها لجأ للتصرف ده لمكايدتها بسبب حب أبنائها ليها.
ومن جانبه، رفض الزوج “نصر” الكشف عن سبب اللي حصل، وقال إن الأزمة انتهت بالطلاق وإعلانه رسميًا أمام الجميع، لو نفتكر برضه في شهر نوفمبر حصلت واقعة غريبة لما ضرب العريس عروسة بالكعكة على وجهها وسقطت أرضًا وأغمى عليها وسط الحضور.. ونسأل هنا إيه اللي ممكن يكون بيدفع الشخص لتصرف زيّ ده؟