بواسطة: ساره علي
مع أول ظهور لجابر في مسلسل بيميو، ويجز فاجأنا كلنا خصوصًا إن دي أول تجربة له في التمثيل. جابر اللي وصل حالًا من الصعيد للقاهرة مكسر الدنيا. ظهور خفيف وقبول كإنك بتشوف ويجز كل يوم على الشاشة. اللهجة الصعيدية ولدغته في حرف الـ (خ) حقيقية جدًا ومفيش تصنع. كمان الإضافات زيّ لزمات الشخصية وحركة الجسم وردود الفعل طبيعية جدًا، وكمان هتحس إنها تلقائية وكإن مفيش تدريب قبلها. فأنت حتمًا ولازم ولابد هتقول إن جابر عز الدين عبد الله مصطفى مسعد اللي بيفهمها وهي طايرة من باريس فعلًا.
إيه المشاهد اللي شوفناها لويجز وعلقت معانا
صدقني أنا نسمة عمرك ما هتحس بيا..
ويجز بيحاول يقنع بيمبو إنه يبات معاه وبالمرة “يفورله المكان ويزرع له شوية ريحان”. كل مشهد لويجز هتبدأ تشوف جزء تاني من الشخصية وبسهولة جدًا بيعرفك مين جابر وبيوصل لك المشاعر اللي بيحس بيها من غير مبالغة. جابر عنده سلالسة وهو بيقول الإيفيه، فبيعرف يضحك المشاهد بسهولة. وده معناه إن في تدريب كتير ومجهود ورا الشاشة علشان يظهر بالسلاسة دي.
احنا مكناش متفجيين على شتيمة الأم..
ويجز كان لازم يقنعنا إن جابر طيب ومالوش في حاجة وإنه جاي بس من الصعيد علشان يشتغل، ونجح في ده فعلًا وظهر بطريقة ماحدش مفكر فيها خالص وطلع جابر بس مش طيب، لأ كمان سوسة ومخبي حاجات كتير. ودي شطارة الممثل اللي يقدر يقنعك باللي هو عاوزه بس، وكمان ماتشكش فيه أبدًا.
أنا هموت يا بيمب..
المشهد ده بَيّن قد إيه جابر ممثل متمكن من أدواته، حركة جسمه وطبقات صوته ورياكشنات وشه، وكمان المشاعر المركبة والانتقال من حالة للتانية ببساطة. المشهد ده ممكن يوقعك من الضحك وأنت بتشوف جابر بيتحول من شخص ضعيف لشخص قوي جدًا بسر بسيط بيمبو بس اللي اكتشفه وأنت كمان لما تشوف المشهد ده هتكتشفه.
ملخص الموضوع إني فكرت في نفسي ونسيت صاحبي..
زيّ ما قدم ويجز المشاهد الكوميدية بشكل احترافي، كمان المشاهد الدرامية كانت صادقة جدًا ومعبرة، وعلشان كده المشهد ده كمان هيعلق معاك، وبأداء ويجز الطبيعي هتحس إنه قاعد معاك وبيكلمك.
ويجز قدر يوصل للسهل الممتنع في أدائه من أول مرة وحببناه كلنا في المسلسل مستنيين نشوفه في أعمال تانية بشخصيات مختلفة، علشان أكيد لسه عنده كتير هيبهرنا بيه بعد ما أثبت إنه مش بس رابر شاطر جدًا، لأ كمان ممثل موهوب.