غير الطرق التقليدية: وصفات مختلفة تقدر تاكل بيها الملوخية

بتتاكل مع الرز أو متغمسة بعيش “ودن القطة” أو ممكن حتى تشربها لوحدها! الملوخية من الأكلات الشعبية المحببة عند المصريين، لها تاريخ ورحلة طويلة انتقلت فيها من سفرة الملوك لعامة الشعب المصري، كان اسمها “ملوكية” نسبة إنها كانت أكلة الملوك المفضلة قبل ما تبقى طبق شعبي. وللسبب ده جبنا لها أكتر من طريقة ممكن ناكلها بيها. بعيدًا عن الوصفات المصرية اللي كبرنا واتربينا عليها.

على الطريقة اللبناني

بنجيب أوراق ملوخية وفراخ مسلوقة متقطعة وكزبرة وأوراق نعناع والتوابل المعروفة”فلفل أسود وكمون وملح” وتوم مفروم وبصل، وبنجيب طاسة نسخنها ونحط فيها زيت وبصل والتوم والكزبرة والنعناع ونقلب فيهم لحد ما يدبلوا وبنضيف عليهم الملوخية، وبعدها عصير الليمون والفرخة المسلوقة اللي قطعناها.

بالدجاج والتمر الهندي

بنجيب معجون التمر الهندي وبندوبه في مياه سخنة وبنسيبه شوية، وبنجيب زيت زيتون في طاسة كبيرة وبنضيف عليه الدجاج وبنقلبه لحد ما يستوي وبنضيف البصل معاه وبعدين الملوخية “المثلجة” والتوم والكزيرة وبنسيبهم على النار لمدة 3 دقائق، وبنزود عليهم مرقة الدجاج وعود قرفة ومياه مغلية، وأخر حاجة بنضيف معجون التمر هندي للملوخية بعد ما بنصفيه بالمنخل. وبنسيبهم يغلوا مع بعض لمدة ربع ساعة علشان يبقوا قوام واحد، وبالهنا والشفا.

على الطريقة الفلسطينية

بنجيب ملوخية ناشفة وننقعها في المياه لمدة 3 دقايق ونكرر العملية دي أكتر من مرة لحد ما تبقى الورقة أكتر ليونة، وبعد كده بنحمرها في طاسة مع سمنة وبنضيف الملح والفلفل والتوم وبنقلب كويس، ومع التقليب ده بنضيف كل شوية مياه بالتدريج علشان تشربها وبعد كده بنضيف الكزبرة وبتتقلب على النار لحد ماتستوي، وممكن نضيف المكسرات المحمصة لتزيين الطبق.

الملوخية الخضرا بالطماطم

في طاسة على النار بنقلب التوم مع السمنة لحد ما يكتسبوا لون دهبي وبنضيف عصير الطماطم وبنقلب لحد ما الطماطم تتسبك، وبنضيف عليها كمية من المياه المغلية ومرقة الدجاج والفلفل الأسود، وبيتساب لحد ما يغلوا مع بعض وبنضيف عليهم الملوخية وبنضربهم مع بعض في المضرب الكهربائي علشان يبقوا خليط واحد.

فتة الملوخية

بتعتبر من أسهل الطرق ومشهورة عند المصريين، في الأول بنجهز الملوخية بالطريقة المصرية المعروفة بالتوم وبالكزبرة والـ”شهقة بتاعتنا” وبعدين بنجهز الصلصلة لوحدها بالتقلية بتاعتها وبنقطع العيش زيّ “ودن القطة” وممكن نعمل جنبها رز أو لحمة.

أخر كلمة: ماتفوتوش قراءة: علشان ماتزهقش: جبنالك وصفات مختلفة للسلطة

تعليقات
Loading...