خلاص هتترحم من مشاوير المرور السخيفة اللي كنت بتقضي فيها ساعات بلا هدف، وده علشان تقدم تظلم على أي مخالفة بتجيلك، وفي الأخر بترجع من المشوار من غير أي نتيجة، دلوقتي الموضوع بقى أسهل بكتير، وأنت في بيتك تقدر تقدم أي تظلم على المخالفة المرورية اللي بيتم رصدها، عن طريق خدمة إلكترونية جديدة بتقدمها بوابة الحكومة المصرية تسهيلًا على المواطن وتجنبًا للتجمعات والزحمة والطوابير، ودي الخطوات علشان تقدر تقدم من خلالها على الموقع الإلكتروني.
- في البداية هتدخل على موقع بوابة الحكومة المصرية وبعدها هتختار خدمات نيابات المرور.
- هتختار الاستعلام عن مخالفات المرور ومنها هتحدد مخالفات رخص العربية أو رخص السواقة.
- هتكتب بعدها البيانات المطلوبة، سواء رقم العربية، أو بيانات الشخص اللي بيسوق.
- هتختار أيقونة التظلمات وتحدد نوع التظلم سواء على العربية أو على اللي بيسوقها، وده وفقًا لقانون المرور الجديد لسنة 2021.
- بعد ما تختار نوع التظلم، هتدخل الرقم القومي وبعدين هتدوس إظهار المخالفة، وهتلاقي كل تفاصيل المخالفة وسببها والفلوس اللي المفروض تدفعها على المخالفة دي، ومن بعدها هتختار أيقونة “تظلم”، وبعد ما تقرأ الشروط والأحكام الخاصة بالخدمة الجديدة، هتدوس “موافق”.
قراءة المزيد
- وبعد ما توافق على التظلم، هتملى البيانات الخاصة بالعربية، وهتضغط على “إرسال الطلب”، وهيظهر بعدها كل تفاصيل إيصال التظلم، ورقم الطلب علشان تستخدمه بعد كده في إنك تتابع الشكوى.
وشوفنا في قانون المرور الجديد سنة 2021، إن المخالفات اللي بيتم رصدها على الطرق، دلوقتي بتتبعت على أرقام تيلفونات أصحابها، زيّ مخالفة تجاوز السرعة أو إنك ماتلبسش حزام الأمان، ده غير الكلام في الموبايل وأنت بتسوق، ومخالفات تانية غيرها نص عليها قانون المرور الجديد.
أخر كلمة: ماتفوتوش قراءة: ضمن الخدمات الحكومية الأونلاين.. تقدر تستخرج أوراقك في دقايق بعيد عن زحمة المصالح الحكومية