بعد مدة طويلة من الحظر الكامل، شوية بشوية بدأت حركة الطيران ترجع تدريجيًا وأخيرًا البلاد فتحت وبقت مستعدة للترحيب بزوارها من جميع أنحاء العالم.. وبالمناسبة السعيدة دي قررنا نقولكم شوية نصايح للبس اللي مينفعش تبقوا لابسينه أثناء الرحلة علشان تضمنوا رحلة مريحة وسهلة على قد ما تقدروا.
بنطلونات ضيقة
كتير من البنات بيحبوا يسافروا بالـ “leggings” بتاعت التمرين لأنها بتديهم شعور بالأناقة والراحة في نفس الوقت.. وده ممكن يكون حقيقي في أي مكان غير على طيارة المسافة بينها وبين الأرض رهيبة، لإن بطبيعة الحال الجسم بينتفخ وإحنا في الجو، فلبس أي حاجة ضيقة ممكن يتسبب في تشنجات وألم وأكيد هتقيد حركتك.. فلازم تتجه للبس بنطلونات أو “sweat pants” واسعة اللي بيحفز حركة الدورة الدموية، ومش هتقلل من شياكتك في أي حاجة متقلقش!
العدسات اللاصقة
لكل اللي بيلبس نضارة بس بيكره شكلها فبيتجه لبديل العدسات، لازم ننبهك إن البديل ده مش هيبقى مناسب أبدًا وأنت في الطيارة لإن جسم الإنسان في الجو بيتعرض للجفاف، وبما إن العدسات اللاصقة أصلًا بتسبب جفاف للعين، ففي الطيارة نسبة جفاف العين هتزيد وده ممكن يسبب مضاعفات على العين.. النضارة حلوه بردو، على الأقل استحملها الكام ساعة دول!
إكسسوارات حجمها كبير
صدقونا إحنا مش ضد الشياكة، بس إن إحنا نلبس سلسلة وزنها كيلو ونص على الطيارة مش أذكى قرار ممكن نأخدوا، لإن قبل ما نركب الطيارة بيحصل تفتيشات وفحوصات في المطار، والإكسسوارات والمجوهرات هتبطأ عملية التفتيش وهتخلي الأجهزة تزمر وتضطري إنك تفضلي تقلعيهم وتلبسيهم.. وعلى إيه كل ده؟ هي سلسة خفيفة هتفي بالغرض وتدي شكل للطقم من غير كل المعاناة دي.
عطور
في بعض الناس عندهم حساسية تجاه العطور، فلما نرش كتير منه، ممكن نبقى إحنا مستمتعين بالريحة الحلوة واللي في الكرسي اللي جنبنا تعبان بسبب الحساسية، واللي ممكن تسبب ربو.. فاحترامًا للركاب اللي ممكن يتعبوا من حاجة زيّ دي، ممكن نكتفي بمزيل العرق والصابون بس وأول ما ننزل من باب الطيارة نغرق نفسنا برفان زي ما إحنا عايزين.
كعب عالي
مش محتاجين نقول إن وإحنا بنمشي على ممر طيارة، مش ممر في عرض أزياء باريس للموضة، وبالتالي مفيش أي داعي نقيد نفسنا في الحركة ونعرض رجلينا لوجع غير محتمل طول الرحلة.. إحنا مبننكرش إن شكلهم حلو، بس بيتحولوا لكابوس مرعب لما تكوني واقفة في طابور طويل وبتجري علشان تلحقي الطيارة ومش عارفة بسببهم.. الجزم المريحة مفيش أنسب ولا أحسن منها.
ملابس ممزقة
أسفين إحنا دمرنا الصورة الذهنية اللي في خيالكم اللي عبارة عن بنطلون مقطع على كعب، بس الجو في الطيارة بيبقى برد جدًا وكمان جوه المطار، ده غير البلد التانية اللي هنوصلها واللي ممكن جدًا يكون جوها أسقع كتير.. فعلشان منأخدش برد يبوظلنا السفرية وعلشان منزعلش جدو اللي راكب جمبنا وبيبص للبنطلون المقطع اللي مبيحبوش، خلينا نختار حاجات مقفلة وتقيلة علشان الجو بيبقى فعلًا برد.
إحنا أكيد محترمين ذوقكم العالي في الفاشون ومهتمين إنكم تبقوا فوق الجو بكامل أناقتكم، بس اللي يهمنا أكتر إنكم تبقوا مرتاحين وميحصلش أي مشاكل.. فالمرة الجاية قبل السفر فكر في النصايح دي وأنت بتختار الطقم اللي هتسافر بيه.