ما بين معلقين الكرة زمان ودلوقتي، مين المفضل بالنسبة لك؟
بواسطة: رحمة حجاج
ماتشات كرة القدم بتبقى دايمًا ممتعة بالجمهور والأجوال وحماس الفرقتين، بس المتعة مستحيل تكمل إلا بمتعة التعليق. في معلقين كرة قدم كتير في مصر، منهم اللي من زمان بس تعليقاتهم هتفضل الناس فاكراها. ومنهم اللي لسه موجود دلوقتي. تعالوا نفتكر معلقين كرة القدم في مصر اللي من غيرهم مش هيكون في متعة للماتشات.
معلقين كرة القدم المصريين زمان:
ميمي الشربيني
هو محمد عبد اللطيف الشربيني وانضم للنادي الأهلي سنة ١٩٥٧ بس قبلها كان بدأ مشواره مع النادي المصري القاهري وفي سنة ١٩٧٦ نجح في اختبار الإذاعة وبقى من ألمع معلقين كرة القدم في مصر. الناس دايمًا هتفضل فاكرة تعليقاته اللي هو معروف بيها.
من أبرز التعليقات دي:
“حازم إمام عنقود مهارات يابنى حولين رجليك تسلم رجليك.”
“حسام حسن بابا نويل الكرة المصرية كبير الهدافين المفروض استنساخ حسام حسن يا جماعة.”
“الكرة داخلة تزغرد ياااه على الكرة وحلاوتها يااااه على الكرة وإثارتها الكرة داخلة تزغرد فى الشبكة لسه بقول لحضراتكم عمرو زكي الديناميت المتفجر المقاتل الشرس.”
محمود بكر
يعتبر محمود بكر واحد من أشهر المعلقين الكرويين في مصر ومعروف بخفة دمه في التعليق وبساطة أدائه. كان كابتن محمود بكر بيلعب في النادي الأوليمبي في عصره الذهبي وفاز بالدوري المصري في سنة ٦٦. أشهر جملة لمحمود بكر اللي بسببها كانت شهرته وتألقه في التعليق هي: “عدالة السماء تنزل على استاد باليرمو.” الجملة دي كان قالها في ماتش مصر وهولندا في كأس العالم ١٩٩٠، لما الحكم حسب ضربة جزاء لمنتخب مصر.
من أبرز تعليقاته:
“السيجارة وكوباية الشاي فى البلكونة.”
“واحد يقولي… أقوله.”
محمد لطيف
كان لقب الكابتن محمد لطيف هو “شيخ المعلقين.” بدأ مسيرته في الملاعب كلاعب في النادي المختلط وبعدها لعب مع منتخب مصر. وخلال دراسته برا مصر، لعب في صفوف نادي الرينجرز أكبر أندية إسكتلندا. وبعدها بدأ الكابتن محمد لطيف مسيرته في التعليق على ماتشات كرة القدم. وكان الكابتن محمد لطيف السبب الأول في دخول حمادة إمام مجال التعليق، لإن هو اللي بدأ تدريبه على التعليق الكروي.
ومن أبرز تعليقاته:
“الكرة إجوال.”
“الجايات أكتر من الرايحات.”
“هوبّا.. هيَّ.”
“يحلّق عليه.”
“الجو النهارده … جو كرة.”
“الله عليك يا خطيب… كُل الدنيا.”
“هُما عاوزين يبوظوا الماتش يا عُبَطة.”
حمادة إمام
أما بالنسبة للكابتن حمادة إمام، فهو من المعلقين اللي ليهم بصمة مميزة في التعليق زيّ ما دايم!ا هيفضل لاعب مميز وكبير لكل محبين كرة القدم. كان لقب الكابتن حمادة إمام في الملعب هو “ثعلب الكرة المصرية.” الكابتن محمد يحيى الحرية إمام هو اسم من الأسامي اللي صنعت تاريخ القلعة البيضاء. هو ابن الكابتن يحيى الحرية إمام حارس مرمى نادي الزمالك ووالد الكابتن حازم إمام لاعب الزمالك السابق. وفاز بالدوري المصري مع نادي الزمالك ٣ مرات. وطبعًا كان عنصر أساسي من عناصر منتخب مصر. بعد اعتزاله، بقى واحد من أكبر معلقين الكرة في مصر وله جُمَلُه الكروية اللي بتميز طريقة تعليقه.
من أشهر الجمل دي:
“وهوباااااااااا جوا الجوول.”
“كرة عالياااااة، خطييييييرة.”
بعد ما افتكرنا أربعة من أشهر معلقين كرة القدم في مصر زمان وافتكرنا أشهر الجمل اللي كل واحد مميز بيها. فهنتكلم دلوقتي عن المعلقين المصريين حاليًا. ورغم إن دلوقتي مفيش معلقين مصريين كتير لو هنقارن بزمان. بس أكيد اللي موجدين دلوقتي حتى لو مش كتير فهما ليهم برضه بصمتهم اللي بتميزهم في التعليق عن أي حد.
مدحت شلبي
الكابتن مدحت شلبي يعتبر دلوقتي من أبرز المعلقين في مصر. بس هو مش بس معلق رياضي، هو كمان مقدم برامج رياضية. وقبل ما يدخل المجال ده، كان ضابط في الشرطة المصرية وكمان تولى منصب المتحدث الرسمي لاتحاد الكرة المصري لمدة عشر سنين. وكمان كان لاعب كرة قدم في نادي الشرطة وبعدها نادي الشمس. وبيعتبر من أكتر المعلقين اللي بيقولوا إفيهات خلال تعليقه على أي ماتش.
من إفيهات وتعليقات كابتن مدحت شلبي المشهورة:
“يا نهااار أبيض.”
“بيبو وبشير .. بيبو والجول.”
“لفها لفة جاتوه.”
“على الحلوة والمرة متواعدين.”
أيمن الكاشف
كابتن أيمن الكاشف معروف إنه هو من المعلقين اللي بيعرفوا ينقلوا اللي بيحصل في الماتش بطريقة مميزة للجماهير. وهو كمان بيعتبر من المعلقين اللي بيضيفوا لأي ماتش متعة وتشويق أكتر. زيّ أي معلق مميز ومحترف، فكابتن أيمن الكاشف له يصمته التعليقية في كل ماتش كرة قدم. ودايمًا الناس بتبقى فاكرة إفيهاته اللي قالها في أي ماتش قبل كده.
من أشهر الجمل اللي كابتن أيمن الكاشف معروف بيها:
“النادي الأهلي زا ماستر أوف ساسبنس.”
“سهلة وبسيطة.”
“قطايف ولطايف وحلويات.”
علي محمد علي
علي محمد علي من أشهر الأسامي المصرية في التعليق الكروي دلوقتي. قبل ما يبدأ مسيرته في التعليق الرياضي كان لاعب كرة قدم قبل ما يتعرض لإصابة قطع في الرباط الصليبي ويعتزل. وزيّ ما قُلنا، أي معلق أكيد عنده الجمل اللي بيبقى معروف بيها وكمان طريقته اللي بتميزه لما بيقول أي إفيه خلال الماتش. والمعلق علي محمد علي من أكتر المعلقين اللي بيزودوا متعة للجماهير على متعة الماتش.
بعد ما افتكرنا أبرز معلقين كرة القدم في مصر زمان ودلوقتي. كل واحد عنده طريقته اللي بتميزه عن أي معلق تاني. وأكيد كمان كل واحد عنده جمهوره اللي دايمًا بيحب يسمعه. ودايمًا هنفضل نقول إن مفيش أي ماتش كرة قدم هيبقى له متعة من غير المعلق وحماسه مع الماتش.