تفاصيل وفاة الطفل ريان.. من ضيق بير لجنة عرضها السموات والأرض

بواسطة: رحمة حجاج

الطفل المغربي ريان بعد ما قدر يستحمل خمس أيام في البئر، توفى إمبارح بعد خمس دقايق من إنقاذه!

ريان هو طفل مغربي كان بيلعب في قرية موجودة في إقليم شفشاون شمال المغرب. المكان اللي ريان كان بيلعب فيه كان قريب جدًا من البئر العميق اللي هو وقع فيه. بس ازاي بئر عميق زيّ ده مايبقاش مقفول بطريقة تكون آمنة!!

ريان وقع في البئر يوم التلات اللي فات والموضوع استمر لحد يوم السبت بسبب صعوبة الوصول لريان وإنقاذه. في الأول، في ناس مدنيين حولوا ينقذوا ريان بس المحاولات كلها فشلت علشان البئر ضيق جدًا.

بعدها السلطات المغربية بدأت عمليات الحفر وفرق الإنقاذ استخدموا جرافات وكاميرات رصد علشان يقدروا يتابعوا حالة ريان الصحية ويتأكدوا إن هو لسه عايش. بس يوم التلات والأربع عدوا من غير ما يوصلوا لأي نتيجة لإن عمليات الحفر لازم تبقى دقيقة جدًا علشان مايحصلش إنهيار صخري على الطفل. في اليوم الرابع، فرق الإنقاذ بدأت تحاول توصل لريان بحفر يدوي. وفي اليوم الخامس والأخير، فرق الإنقاذ المغربية كانت خلاص على بعد سنتيمترات قليلة على إنهم يوصلوا لريان.

يوم السبت بالليل، فرق الإنقاذ بمساعدة دكتور إنعاش قدروا إنهم يطلعوا الطفل ريان من البئر وهو لسه عايش. بس للأسف بعد ما طلع بخمس دقايق توفى. الملاك ريان كان سبب في إننا نشوف العالم العربي كله والعالم كمان متفق على حاجة واحدة، وهي الدعاء لريان إنه يخرج بالسلامة. السوشيال ميديا كلها كانت عبارة عن مكان موحد للدعاء لريان وأهله. وبعد ما طلع بيان رسمي إن ريان توفى، السوشيال ميديا كانت المكان اللي أعلن حزن العالم كله على ريان فيه. في ناس نعت أهل ريان على فيسبوك وإنستجرام وتويتر ودعوا لهم بالصبر. وناس تانية بدأت تكتب إن أكيد في حكمة من عند ربنا بعد اللي حصل ده. بس اللي الكل اتفق عليه إن ريان بطل وملاك عند ربنا.

كمان شُفنا مساعدة الشعب المغربي كله لبعض في الموقف الصعب ده. شُفنا ازاي كان في ستات كبار بيعملوا أكل طول الخمس أيام لفرق الإنقاذ. وكمان شفنا الناس كلها وهي بتساند أهل ريان وواقفين جانبهم كإن ريان هو ابنهم كلهم. وإن طول الوقت ده كان كل هم الناس إن ريان يطلع بالسلامة وبصحة كويسة. حتى إنهم نزلوا له قشطة ولبن علشان يساعدوه إنه يصمد أكتر لحد ما يطلعوه.

ريان كان سبب في إن العالم كله يتفق ويتوحد على حاجة واحدة، إنهم يدعوا بخروج ريان سليم وعايش لأهله. وبعد وفاته، العالم كله برضه اتفق على حاجة واحدة وهي الحزن الكبير على فراقه والدعاء لأهله بالصبر. وياريت الأماكن اللي فيها بئور وأماكن خطر زيّ دي تكون متأمنة كويس علشان مانخسرش أطفال تاني زيّ الملاك ريان.

آخر كلمة: العالم كله حزين على وفاة الطفل ريان بعد ما استحمل خمس أيام في البئر! وماتفوتوش قراءة: خبر حلو: إنقاذ الطفل ريان المغربي بعد وقوعه في بئر من يوم الثلاثاء

تعليقات
Loading...