النهارده كل الناس قاعدة على أعصابها ومستنية الماتش اللي هيجمع بين مصر والسنغال في بطولة كأس الأمم الأفريقية. وكل المصريين والمنتخبات العربية التانية عندهم أمل كبير في فوز مصر وتحقيق البطولة التامنة، لإن أدائهم في البطولة كلها من أول ماتش لأخر ماتش كان مشرف. أداء يستحق الوصول للنهائي خصوصًا بعد آخر مباراة اللي كانت بين مصر والكاميرون واللي حبست أنفاس المصريين لآخر دقيقة وحسمتها ركلات الترجيح اللي كان البطل فيها حارس المرمى المصري أبو جبل.
وبمناسبة وصولنا للنهائي جمعنالكم تاريخ المواجهات بين مصر والسنغال ومين في البلدين كان بيفوز أكتر.
تاريخ المواجهات بين الفراعنة والسنغال:
- 1986: البطولة كانت بتتلعب على أرض مصر بس قدر الفريق المنافس إنه يفوز بهدف بلا رد.
- 2000: كان في دور المجموعات وفاز فيها الفراعنة بهدف للعميد حسام حسن.
- 2002: اتجدد اللقاء تاني بس فاز الفريق السنغالي بهدف على الفراعنة.
- 2006: كانت في نصف نهائي أمم أفريقيا، وفاز فيها منتخبنا بهدفين مقابل هدف، الأول كان من أحمد حسن وهدف الفوز سجله عمرو زكي “كان في مواجهة شهيرة كانت بين ميدو وحسن شحاتة لما اعترض على استبداله بعمر زكي ووقتها نزل عمرو وخلص الماتش بعد نزوله بدقيقة واحدة بهدف التأهيل”.
- 2002: اتقابلوا مع بعض في تصفيات كأس العالم مرتين، الأولى انتهت بالتعادل السلبي والتانية انتهت بفوز مصر.
- 2006: فاز فيها المنتخب المصري بقيادة حسن شحاتة.
- 2015: كسبت السنغال في ماتشات الذهاب والعودة، الأولى بهدفين والتانية بهدف من غير رد.
- أما عن البطولات الودية بينهم فكان لمصر الحصة الأكبر في الفوز.
13 مباراة جمعت بين مصر والسنغال قبل مباراة النهارده، حقق خلالها “الفراعنة” الفوز في سبع لقاءات، والسنغال أربعة بس واتعادلوا في اتنين.
المنتخب المصري كان هو الأكثر تتويجًا باللقب الأفريقي برصيد سبع بطولات، وكان الأكثر وصولًا للمباراة النهائية برصيد 10 نهائيات. وأخدت الكأس خلال 1957 و1959 و1986 و1998 و2006 و2008 و2010. أما عن السنغال، فوصلت للنهائي مرتين بس وخسرت في المرتين.
بالأرقام مصر كانت هي الأكثر تتويجًا ولها فرصة أكبر في الفوز. بس النهارده الموضوع مختلف لإن الماتش هيجمع بين صلاح وماني أهم مهاجمين اللعبة الفترة دي، والكرة دايمًا فيها مفاجأت.. بس احنا مستنيين التامنة!